İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 188 Hüküm no: 227 Orijinal metin no: [24b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Beşe b. Abdullah’ın boşadığı Ayşe Hâtun bt. Hasan’ı rahatsız ettiği Ayşe Hâtun bt. Hasan meclis-i şer‘de zevci olan Musa Beşe b. Abdullah mahzarında takrîr-i da‘vâ edip, merkūm Musa Beşe târih-i kitâbdan yedi ay mukaddem beni talâk-ı selâse ile tatlîk edip âhar diyâra gitmiş idi. Hâlâ gelip benimle yine zevciyyet üzre mu‘âşeret murâd eder men‘ olunmak murâd ederim dedikde, gıbbe’s-suâl merkūm Musa husûs-ı mezbûru inkâr edicek müdde‘iyye-i mezbûreden müdde‘âsına mutâbık beyyine taleb olundukda udûlden Mustafa Çavuş ve Eyüb b. Mehmed nâm kimesneler meclis-i şer‘a hâzırân olduklarında gıbbe’l-istişhâd fi’l-vâki‘ merkūm Musa Beşe zevcesi mezbûre Ayşe’yi târih-i merkūmda talâk-ı selâse ile bizim huzûrumuzda tatlîk eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîli’ş-şer‘î ve’t-tezkiye şehâdetleri hayyiz-i kabûlde vâkı‘a oldukdan sonra mûcebiyle hükm olundu. Mâ vaka‘a gıbbe’t-taleb ketb olundu. Hurrire fi’l-yevmi’t-tâsi‘ aşer min şehri Rebî‘ilâhir min şuhûri sene [10] 27. Şuhûdü’l-hâl: Mehmed b. Eyüb, Mehmed b. Sefer, Mustafa b. Cafer, Ahmed b. Ömer, Ömer b. Mustafa, Ahmed b. Mehmed ve gayruhüm.