İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 188 Hüküm no: 228 Orijinal metin no: [24b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bezzâz Ahmed b. Mahmud ile ortağı Yahya b. Mustafa borç davasında anlaştığı Mahmiye-i İstanbul’da Karaman’da bezzâz olan Ahmed b. Mahmud nâm kimesne meclis-i şer‘-i şerîfde hâmilü’l-kitâb Yahya b. Mustafa mahzarında takrîr-i kelâm edip, bundan akdem bezzâzlık san‘atında mezbûr Yahya ile şerîk olup, ba‘de küllî hesâb, mezbûrun zimmetinde dört bin fıddî akçe hakkım kaldı deyû merkūm Yahya’dan da‘vâ ve taleb ettiğimde, ol dahi zimmetimde akçe kalmadı deyû inkâr etmeğin, beynimizde münâza‘ât-ı kesîre vâkı‘a olmuş idi. El-hâletü hâzihî beynimizde Müslimûn-ı muslihûn tavassut edip, es-sulhu seyyidi’l-ahkâm fehvâsınca husûs-ı mezbûru an-inkâr bin beş yüz râyic fi’l-vakt akçeye merkūm Yahya ile beynimizde akd-i sulh ihdâs etdiklerinde, ben dahi sulh-ı mezbûru kabûl ve bedel-i sulh olan meblağ-ı mezbûru merkūm Yahya yedinden bi’t-tamâm ahz u kabz edip, husûs-ı mezbûra müte‘allik da‘vâ ve talebden mezbûr Yahya’nın zimmetini ibrâ[i-âm] ile ibrâ eyledim. Min ba‘de da‘vâ ve nizâ‘ım yokdur dedikde, mukırr-ı mezbûrun ikrâr-ı meşrûhun el-mukarru lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-hâmis min [şehri] Rebî‘ilâhir sene seb‘a ve ışrîn ve elf. Şuhûdü’l-hâl: İbrahim [b.] Mehmed, Yusuf [b.] Abdullah, Süleyman b. Mustafa, Murad b. Mehmed ve gayruhüm.