İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 189 Hüküm no: 229 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa’nın, ölen Eğriboz mutasarrıfı Ali Paşa’nın varisleriyle anlaştığı Vilâyet-i Rumeli’nde Eğriboz sancağında Salta nâm kasaba sâkinlerinden fahrü’l-akrân Mehmed Ağa b. Pîrî tarafından vech-i âti’l-beyân üzre sulh ve ibrâya ve bedel-i sulhu kabza vekîl olup, hasm-ı şer‘î-i câhid mahzarında yine kasaba-i mezbûre sâkinlerinden Ali Efendi b. Hüseyin ve Mehmed Efendi b. Muharrem şehâdetleri ile şer‘an vekâleti sâbite olan li ebeveyn karındaşı fahrü’l-kuzât Mustafa Efendi mahfil-i kazâda, bundan akdem livâ-i Eğriboz’a ber vech-i arpalık mutasarrıf olup vefât eden merhûm Ali Paşa b. el-merhûm Hüseyin Ağa’nın verâseti sulbî kebîr oğlu Mehmed Bey’e ve sagīr oğlu Hasan Bey’e ve sulbiye kebîre kızları Aliye ve Ayşe’ye münhasıra idiği zâhir ve müte‘ayyin ve fahrü’l-a‘yân Mehmed Ağa b. Kadri sagīr-i mezbûrun vasiyy-i şer‘îsi ve mezbûretânın husûs-ı âti’z-zikre vekîli olup, vekâleti şer‘an sâbit idiği bâhir ve mütehakkik oldukdan sonra mezbûrân Mehmed Bey ve Mehmed Ağa mahzarlarında takrîr-i kelâm edip, müteveffâ-yı mezbûr livâ-i mezkûra mutasarrıf iken müvekkilimden bi gayri vech-i şer‘î elli bin akçe aldı deyû da‘vâ eylediğimde, verese-i mezbûre dahi inkâr etmeğin, ben dahi isbât sadedinde iken beynimizde muslihûn-ı Müslimûn tavassut edip, bu husûs sulh olunmak sagīr-i mezbûr hakkında enfa‘dır deyû husûs-ı mezbûru an-inkâr sekiz bin akçeye sulh ettiklerinde, ben dahi sulh-ı mezbûru kabûl ve bedel-i sulh olan sekiz bin akçeyi bi’t-tamâm mezbûrân yedlerinden ahz u kabz ettikden sonra, husûs-ı mezbûra müte‘allik âmme-i da‘âvâda verese-i mezbûrenin zimmetlerin ibrâ-i âm ile vekâleten ibrâ etdim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fî evâsıtı şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mahmud Efendi el-kadı es-Salinavî, Feyzullah Efendi el-kadı es-Salinavî, Abdülbâkī Efendi es-Salinavî, La‘lî Efendi, Murad b. Mehmed, Hasan Ağa b. ( ), Üstâd Mehmed, Murad b. Halil, Kadri b. İlyas ve gayruhüm.