İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 189 Hüküm no: 230 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi’nin, Mehmed Bey ve Mehmed Ağa ile sulh oldukları Bâlâda mezkûr olan Mustafa Efendi âhar karındaşı Ahmed Efendi tarafından kezâlik husûs-ı âti’z-zikre vekîl olup, yine şâhidân-ı mezbûrân şehâdetleri ile şer‘an vekâleti sâbite oldukdan sonra mahfil-i kazâda, yine mezbûrân mahzarlarında minvâl-i muharrer üzre, livâ-i mezbûra müteveffâ-yı [mezbûr] mutasarrıf iken karındaşım mezbûr Ahmed Efendi’den sende mâl-ı mîrî vardır deyû, ben muhassılım deyû, bi gayri vech-i şer‘î on sekiz bin akçe alıp yedine hat ve hâtemini müştemil tezkire vermişidi deyû da‘vâ ettikde, yine vech-i muharrer üzre inkâr edip, bu husûs sagīr hakkında sulh enfa‘ olmağın, meblağ-ı mezbûru muslihûn tavassut edip, dört bin akçeye sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört bin akçeyi mezbûrân Mehmed Bey ve Mehmed Ağa yedlerinden bi’t-tamâm ahz u kabz edip, verese-i mezbûrenin zimmetlerinde vekâletim hasebiyle husûs-ı mezbûra müte‘allik da‘vâdan ibrâ etdim ve müvekkilim Ahmed Efendi yedine müteveffâ-yı mezbûrun verdiği tezkireyi verese-i merkūmeye teslîm etmeye ta‘ahhüd eylerim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Es-Sâbikūn.