Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 146 Hüküm no: 117 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Çelebi’nin Abaza asıllı cariyesi Saliha’yı serbest bırakması Efendi hazretleri imzâsıyladır İşbu orta boylu ak kara kaşlı kara gözlü Abazaviyyetü’l-asl bâ‘isetü’l-kitâb Saliha bt. Abdülvahab nâm bikr-i bâliğa Dîvân-ı kāimmakām-ı hazret-i sadrazamîde akd olunan meclis-i şer‘-i şerîfde rakīk olmak üzere kendüye vâzı‘u’l-yed olan Receb Çelebi b. el-Hâc Murad nâm kimesne mahzarında üzerine da‘vâ ve takrîr-i kelâm edip ben Abaza diyârında Soğuksu nâm karye keferesinden Mir Zagan nâm harbînin câriyesi olup ve mezbûr Mir Zagan’ın süd karındaşı ve benim vâlidem olan ( ) nâm hatun mezbûr Receb Çelebi’nin odalık câriyesi olmağla mâlikim olan mezbûr Mir Zagan süd karındaşı mezbûrenin yerine beni mezbûr Receb Çelebi’ye verip kız karındaşını tahlîs etmek için bâzergân tâifesinden Abaza Ahmed nâm kimesne ile beni mezbûr Receb Çelebi’ye irsâl, ben dahi râziye olup mezbûr Abaz Ahmed ile İstanbul’a gelip mezbûr Ahmed beni mezbûr Receb Çelebi’ye teslîm etdikde mezbûr Receb Çelebi merkūm Mir Zagan’ın kız karındaşını vermeyip ben dâre teba‘iyet ile hürre olmuş iken mezbûr Receb Çelebi rakīk olmak üzere bi-gayr-ı hakkın bana vaz‘-ı yed eder, suâl olunup kasr-ı yedine tenbîh olunup sebîlim tahliye olunmak matlûbumdur dedikde gıbbe’s-suâl mezbûr Receb Çelebi cevâbında mezbûr Mir Zagan yerine kız karındaşını verip mevsûfe-i mezbûreyi almak için bana irsâl etdikde ben kız karındaşını vermeyip ikisi dahi yedimde kaldıkda mezbûr Mir Zagan kız karındaşımı vermez ise câriyemin kıymetini göndersin demekle ben dahi kıymeti için bir tüfenk ve bir kumaş kaftan ve ba‘zı eşyâ irsâl edip bu vech ile mevsûfe-i mezbûreyi iştirâ edip şirâen malik olmuş idim dedikde, mezbûr Receb Çelebi’den takrîr-i meşrûhunu mübeyyine [beyyine] taleb olundukda ityân-ı beyyine için istimhâl etmekle mehl-i şer‘î ile imhâl olunduğundan sonra elli beş esedî? gün mürûr edip mezbûr Receb Çelebi ikāmet-i beyyine edemeyip tahlîfe dahi tâlib olmamağın mûcebince mevsûfe-i mezbûreden kasr-ı yedine mezbûr Receb Çelebi’ye tenbîh olunup mevsûfe-i mezbûrenin sebîli tahliye olunmağın mâ-vaka‘a bi’t-taleb ketb olundu. Fî-gurret--i Cumâdelûlâ li-sene ihdâ ve semânîn ve elf. Şuhûdü’l-hâl: Umdetü’t-tahrîr ve’l-kalem Osman Efendi müzekkire, zahrü’l-akrân Mehmed Ağa ser-muhzırân, fahrü’l-eşbâh Derviş Ağa kethüdâ-yı hazret efendi, Mehmed Çavuş b. Abdullah.