İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 196 Hüküm no: 242 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye bt. Mehmed’in eşi Hüseyin’den boşandığı Mahmiye-i İstanbul’da Ebâ Eyyûb-i Ensârî kapısı kurbunda Koca Mustafa Paşa mahallesi sâkinelerinden Safiye bt. Mehmed nâm hâtun meclis-i şer‘de, talâk-ı selâse ile zevc-i mutalliki olan Hüseyin b. Mehmed nâm kimesne mahzarında ikrâr ve ta‘bîr ani’l-merâm edip, mezbûr Hüseyin zimmetinde mehr-i mu‘accelden iki bin akçe ve mehr-i müeccelden dahi kezâlik iki bin akçe hakkım olup, meblağ-ı mezbûr dört bin akçeden iki bin nakd-i râyic fi’l-vakt akçesin mezbûr Hüseyin yedinden ahz u kabz edip, iki bin akçe mehr-i müeccelimden ve nafaka-i iddetimden fâriğa olup, târih-i kitâba gelinceye değin birbirimizin zimmetinde zevciyyete müte‘allik olan cemî‘-i de‘âvîden ibrâ-i âm ile ibrâ ve ıskāt-ı tâm ile ıskāt eyledim. Ba‘de’l-yevm mazmûn-ı kitâba muhâlif benden veya vekîlimden da‘v[â] sâdıre olursa lede’l-hükkâmi’l-kirâm mesmû‘a ve makbûle olmaya dedikde, mukırra-i mezbûrenin ikrâr-ı meşrûhunu merkūm Hüseyin bi’l-muvâcehe tasdîk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâlis ve’l-ışrîn [min şehri Rebî‘ilâhir] min şuhûri sene seb‘a ve ışrîn ve elf. Şuhûdü’l-hâl: Pervâne b. Kurd, Mustafa b. Yusuf, Mustafa b. Mehmed, İbrahim b. Kaya, Mustafa b. Hamza ve gayruhüm.