İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 197 Hüküm no: 243 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kavga eden köle Süleyman ile Rıdvan’ın anlaştığı Fahrü’l-akrân Osman Bey b. Abdülmennân nâm cündî mahfil-i kazâda Süleyman b. Abdullah nâm kimesne tarafından husûs-ı âti’z-zikri sulh ve ibrâya ve bedel-i sulh olan meblağı kabz ve îsâle vekîl olup, vekâleti mahzar-ı hasm-ı câhidde Hasan Bey b. Abdullah el-cündî ve Hızır Beşe b. Abdullah er-râcil şehâdetleri ile vekâleti sâbite olan râfi‘ü’l-kitâb Ali Beşe b. Abdurrahman nâm râcil mahzarında ikrâr-ı tâm ve takrîr-i kelâm edip, târih-i kitâbdan üç gün mukaddem mahmiye-i İstanbul’da Karagümrük çarşısında müvekkil-i mezbûr Süleyman benim abd-i memlûküm olan Rıdvan b. Abdullah’ı sol küreği yanından ve sol kolundan bıçak ile urup mecrûh edip, mezbûr Rıdvan dahi mezbûr Süleyman’ı sol kolundan ve alnından ve sol budundan bıçak ile urup mecrûh edip, lâkin mezbûr Rıdvan’ın cerhi muhkem olmakla mezbûr Süleyman’dan da‘vâ ve taleb edip, beynimizde muhâsemât-ı kesîr vâkı‘a olup, hâlâ tavassut-ı muslihûn ile husûs-ı mezkûru inkârdan dört bin akçeye sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı merkūmu vekîl-i merkūm Ali Beşe yedinden alıp kabz edip, müvekkil-i mezbûr Süleyman’ın zimmetini husûs-ı mezkûr da‘vâsından ibrâ-i âm ile ibrâ ve ıskāt-ı tâm ile ıskāt etdim. Min ba‘d benden asâleten veya vekîlimden bi’l-vekâle da‘vâ sâdıre olursa lede’l-hükkâmi’l-kirâm mesmû‘a ve makbûle olmaya dedikde, merkūm Osman Bey’i ikrâr-ı meşrûhunda merkūm Ali Beşe dahi vekâlet-i mahkiyesi hasebiyle vicâhen ve şifâhen tasdîk ve tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Musa Bey b. Abdülkerim, Mehmed Bey, Ahmed Bey, Mehmed Bey, Yusuf b. Abdullah.