İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 198 Hüküm no: 244 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nâzenin bt. Abdullah’ın, Râbia Hâtun bt. Mehmed ile haklaşması Vilâyet-i Anadolu’da kasaba-i İznikmid’de sâkine olan Nâzenin bt. Abdullah meclis-i şer‘-i şerîfde, mahmiye-i İstanbul’da Cebe Ali kapısı hâricinde sâkine olan sâhibü’l-kitâb Râbia Hâtun bt. Mehmed muvâcehesinde ikrâr ve ta‘bîr ani’l-merâm edip, bundan akdem mezbûre Râbia Hâtun emlâkimden on üç filori kıymetli bir mor ferâce ve altı yüz akçe kıymetli bir kumaş alaca kaftan ve üç yüz yirmi akçe kıymetli diğer alaca kaftan ve iki yüz akçe kıymetli bir sâde ve iki yüz kırk akçe kıymetli iki zıbın ve yüz yirmi akçelik bir arakiyye ve beynimizde kıymetleri ma‘lûme dört gömlek ve altı toka ve yedi makrama ve on iki arşınlık iplik ve iki çarşeb ve bir kilim ve bir yorgan ve bir sandık ve bir döşeğimi ahz eyledi deyû da‘vâ ettikde, inkâr eylemeğin, beynimizde münâza‘a-i şedîde ve muhâsemât-ı ekîde vâkı‘a olmuş idi. El-hâletü hâzihî tavassut-ı muslihîn ile husûs-ı mezbûr an-inkâr yedi yüz akçeye sulh olunup, ben dahi sulh-ı mezbûru kabûl ve bedel-i sulh olan meblağ-ı merkūmu bi’t-tamâm mezbûre Râbia Hâtun yedinden ahz u kabz edip, zimmetini husûs-ı merkūma müte‘allik olan cemî‘-i de‘âvî ve mütâlebât ve eymân ve muhâsemâtdan ibrâ-i âm ile ibrâ ve ıskāt-ı hak eyledim. Ba‘de’l-yevm mazmûn-ı kitâba muhâlif benden veya vekîlimden da‘vâ sâdır olursa lede’l-hükkâmi’l-kirâm mesmû‘a ve makbûle olmaya dedikde, gıbbe’t-tasdîk-i vicâhen mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Rebî‘ilâhir sene seb‘a ve ışrîn ve elf. Şuhûdü’l-hâl: Ali Beşe b. Abdullah ani’l-kasabati’l-mezbûre, Abdi b. Hızır, Davud Beşe b. Murad, İbrahim b. Receb el-muhzır, Mehmed Bey b. Revan el-cündî, es-Seyyid Cafer b. ( ), es-Seyyid Hüseyin Müstedam Bey b. Abdullah, Kadri b. Kıyâmî, Mehmed b. Ahmed, Ramazan b. Hüseyin ve gayruhüm.