İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 199 Hüküm no: 246 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Hasan Çelebi b. Derviş Ağa’nın evini İbrahim Ağa b. Ebülkasım’a satması Dergâh-ı âlî -dâme mahfûfen bi’l-me‘âlî- yeniçerilerinden Hasan Çelebi b. Derviş Ağa meclis-i şer‘-i şerîfde, hâfız-ı hâze’l-kitâb fahrü’l-akrân İbrahim Ağa b. Ebülkasım mahzarından takrîr-i kelâm edip, havâss-ı Kostantıniyye kazâsına tâbi‘ Boğluca nâm karyede vâki‘ üç tarafı tarîk-i âm ve bir tarafı çayırlık ile mahdûd olup, muhavvata-i dâhiliyesi iki bâb tahtânî beyti ve bir kasr-ı ve bir anbarı ve önünde bir kûfegî ve bir ahırı ve fırını ve bir çatma anbarı ve bi’r-i mâ ve eşcâr-ı müsmire ve gayri müsmireyi muhtevî bahçeyi ve muhavvata-i hâriciyesi bir çatma beyti ve bir ahırı ve fırını ve iki bâb süflâ beyti ve bi’r-i mâ ve hadîkalı ve dolablı su kuyusunu ve bir yel değirmenini müştemil olan mülk menzilimi, cümle tevâbi‘ ve levâhıkı ile ve içinde mevcûd olan Rûsiyyü’l-asl bir kul ve Rûsiyye bir câriyemi ve dokuz re’s kara sığır ineğimi ve dört re’s buzağı ve on re’s ve iki çift su sığırı öküzlerimi ve altı re’s kara sığır öküzümü sunûf-ı vâhide ile mezbûr İbrahim Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz yirmi bin nakd-i râyic fi’l-vakt fıddî-i Osmânî akçeye bey‘ ve teslîm ve kabz-ı semen etdim, keyfe mâ yeşâ mutasarrıf olsun dedikde, mukırr-ı mezbûru ikrâr-ı meşrûhunda el-mukarru leh[ü’l-mezkûr] bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâbi‘ ve’l-ışrîn min şehri Rebî‘ilâhir sene seb‘a ve ışrîn ve elf. Şuhûdü’l-hâl: Mehmed Beşe b. Hasan er-râcil, Mehmed b. Mustafa, Murad b. Mehmed, Mustafa Beşe çukadâr, İbrahim b. Cafer, Mustafa b. Mehmed, İbrahim b. Hasan, Mustafa b. Hasan, Mustafa b. Mehmed, Mehmed b. Mustafa, Yahya b. Mehmed, Mehmed b. Ramazan ve gayruhüm mine’l-hâzırîn.