İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 224 Hüküm no: 289 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Abdullah’ın Karamürsel’deki emlâkını Mehmed Ağa b. Mustafa’ya sattığı Husûs-ı âti’l-beyânı mahallinde ketb ü tahrîr olunmak için kıbel-i şer‘-i hatîr-i lâzımü’t-tevkīrden âdem taleb olundukda, fahrü’l-müderrisîn Mevlânâ Hamdi Efendi b. eş-Şeyh Mehmed irsâl olunup, ol dahi mahmiye-i İstanbul’da Nahılbend mahallesinde sâhibü’l-kitâb fahrü’l-a‘yân Mehmed Ağa b. Mustafa el-Bevvâbü’s-sultânî’nin menziline varıp, akd-i meclis-i şer‘î ettikde, Saray-ı sultânî ağası iken vefât eden merkūm Hasan Ağa’nın vâlidesi fahrü’l-muhadderât zahrü’l-muvakkarât Fâtıma Hâtun bt. Abdullah meclis-i mezbûrda merkūm Mehmed Ağa mahzarında takrîr-i kelâm edip, oğlum merhûm-ı mezbûr hâl-i sıhhatinde bana hibe ettiği emlâkden Üsküdar kazâsına tâbi‘ Karamürsel nâhiyesinin Kavak nâm mevzi‘de vâki‘ bir tarafdan el-Hâc Mehmed b. Halil mülkü ve bir tarafdan Davud Ağa mülkü ve bir tarafdan Mustafa b. el-Hâc Durmuş mülkü ve bir tarafdan Mehmed b. Mustafa mülkü ile mahdûd olup, büyût-ı müte‘addideyi ve bağ ve bağçeyi müştemil olan mülk menzilimi, cümle tevâbi‘ ve levâhıkıyla ve Dereköy nâm mevzi‘de vâki‘ bir tarafdan el-Hâc Mehmed b. Halil mülkü ve bir tarafdan Osman Reis mülkü ve bir tarafdan Abdi Bey mülkü ile mahdûd olup, büyût-ı müte‘addideyi müştemil mülk menzilimi kâffe-i levâhık tarîki ile ve içinde mevcûd olup beynimizde ma‘lûm âlât-ı hırâset ve esbâb-ı zirâ‘ati ve sekiz re’s kara sığır öküzlerimi safka-i vâhide ile mezbûr Mehmed Ağa’ya yetmiş altı bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve kabz-ı semen etdim ve zikr olunan menziller ile ma‘an mutasarrıf olunan kıt‘a tarlaların hakk-ı tasarruflarını sâhib-i arz ma‘rifetiyle mezbûr Mehmed Ağa’ya tefvîz etdim, ol dahi tefevvüz ve kabûl ettikden sonra, mukābele-i tefvîzden yedinden dört bin akçe ahz u kabz etdim. Ba‘de’l-yevm zikr olunan emlâk ve arzımı keyfe mâ yeşâ mutasarrıf olsun dedikde, mukırra-i mezbûru ikrâr-ı meşrûhunda el-mukarru lehü’l-mezbûr bi’l-muvâcehe tasdîk ettikden sonra, vâki‘ hâli mevlânâ-yı mezbûr mahallinde tahrîr ve mahfil-i kazâda ihbâr ve takrîr etmeğin, mâ vaka‘a ketb olundu. Hurrire fi’l-yevmi’s-sâbi‘ min [şehri] Cemâziyelevvel li sene seb‘a ve ışrîn ve elf. Şuhûdü’l-hâl: Mehmed Ağa b. Abdullah ahi’l-merhûm Hâfız Ahmed Paşa, Mustafa Ağa b. Hüsrev ez-Zevvâku’s-Sultânî, Ali Ağa b. Abdullah el-müteferrika, es-Seyyid Mehmed b. es-Seyyid Ali el-imâm, Hasan Çavuş b. Abdullah, Mustafa Çelebi b. Ahmed, Mustafa b. Ahmed, İbrahim Çavuş b. ( ), Mehmed Çelebi b. ( )