İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 225 Hüküm no: 290 Orijinal metin no: [32a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Kutlu ile Ali b. Hacı’nın menzillerini takas etmeleri Vilâyet-i Anadolu’da medîne-i Kayseriye tevâbi‘inden İstefne? nâm karye sükkânından İbrahim b. Kutlu nâm kimesne meclis-i şer‘-i şerîfde, râfi‘ü’l-kitâb Ali b. Hacı mahzarında ikrâr-ı tav‘î edip, karye-i merkūmede vâki‘ bir tarafı mezbûr Ali mülküne ve bir tarafı Sava v. Körpe nâm zimmî mülküne ve bir tarafı vâdiye ve tarafı râbi‘i tarîk-i âmma müntehî olup, bir yer evini ve bir matbah ve bir sofayı ve bir ahûrı ve samanlığı ve muhavvatayı müştemil olan mülk menzilimi, mezbûr Ali’ye bey‘-i kat‘î ile elli kâmil guruşa bey‘ edip, semeninden yirmi beş guruşunu yedinden alıp kabz edip, zimmetinde yirmi beş guruşum kaldığından sonra, mezbûr Ali dahi karyemizde vâki‘ bir tarafı Yuvan v. Demür zimmî mülküne ve bir tarafı iştirâ eylediğim menzil-i mezkûra ve bir tarafı vâdi-i mezbûra ve taraf-ı râbi‘i tarîk-i âmma müntehî olan mülk menzilini tevâbi‘ ve levâhıkıyla yirmi beş kâmil guruşa bana bey‘ edip, ben dahi ibtiyâ‘ eylediğimden sonra, meblağ-ı merkūm yirmi beş guruşu menzil-i sâbıku’z-zikr semeninden mezbûr Ali zimmetinde olan yirmi beş guruşa takas edip, ben dahi vech-i muharrer üzre mukâssa etdim dedikde, merkūm İbrahim’i ikrâr-ı meşrûhunda mersûm Ali dahi vicâhen tasdîk ve vech-i merkūm üzre zikri sâbık mülk menzilini yirmi beş guruşa bey‘ edip, semenini kendi zimmetinde menzil bahâsından olan yirmi beş guruşa takas eylediği tahkīk etmeğin, mâ hüve’l-vâki‘ gıbbe’t-taleb ketb ü tahrîr olundu, yed-i tâlibe def‘ olundu. Tahrîren fi’l-yevmi’t-tâsi‘ min [şehri] Cemâziyelevvel li sene seb‘a ve ışrîn ve elf. Şuhûdü’l-hâl: Öksüz Veli, İsmail, Himmet b. Mustafa, Yunus b. Bayram, Selâm b. Hasan ve gayruhüm.