İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 226 Hüküm no: 291 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Abdullah’ın Rus asıllı câriyesi Reyyan’ı eşi Mihmân Hâtun’a sattığı Mahmiye-i İstanbul’da Çerağcı mahallesinde sâkin Süleyman b. Abdullah meclis-i şer‘-i enverde, zevcesi işbu hâfızatü’l-kitâb Mihmân Hâtun bt. Abdullah mahzarında ikrâr [ve] i‘tirâf edip, hâlâ silk-i mülk-i sarîhimde muntazam olan işbu hâzıra bi’l-meclis gök gözlü açık kaşlı sarışın orta boylu Rûsiyyetü’l-asl olup, rıkkıyyeti[ni] mu‘terife Reyyân? nâm câriye-i memlûkemi zevcem merkūme Mihmân Hâtun’a beş bin nakd-i râyic fi’l-vakt fiddî-i Osmânî akçeye bey‘-i kat‘î ile bey‘ edip, semeni olan meblağ-ı merkūmu tamamen yedinden ahz u kabz eyledim. Ba‘de’l-yevm câriye-i merkūme mesfûre Mihmân Hâtun’un şirâ’en memlûke câriyesidir dedikde, mukırr-ı mezbûr Süleyman ikrâr-ı meşrûhunda mezbûre Mihmân Hâtun bi’l-muvâcehe tasdîk etdikden sonra, mâ hüve’l-vâki‘ bi’t-taleb ketb ve sebt olundu. Tahrîren fi’l-yevmi’l-âşir min [şehri] Cemâziyelevvel min şuhûri li sene seb‘a ve ışrîn ve elf. Şuhûdü’l-hâl: Yusuf b. Bayram, İbrahim b. Receb, Mustafa [b.] Hamza, Hamza b. Mustafa Du‘âyî.