İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 226 Hüküm no: 292 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cedid Ali Paşa vakfı arsasına yapılan şehnişinin yıkılması Mahmiye-i İstanbul’da Kızıltaş mahallesinde vâki‘ merhûm Ali Paşa-yı cedîd Vakfı’nın kāimmakām-ı mütevellîsi ve mu‘temedi olan Hasan Efendi b. İbrahim ve câbîsi olan Mehmed Halîfe b. Ferruh mahfil-i kazâda, mahalle-i merkūmede merhûm Kâtib Bâli mescidinde imâm olup akār-ı âti’z-zikr yedinde idiği zâhir ve mütebeyyin olan Habib Efendi b. Mustafa mahzarında takrîr-i kelâm edip, hâlâ mezbûr Habib Efendi tasarrufunda olup mahalle-i mezkûrede vâki‘ bir tarafı merhûm-ı mezbûr Kâtib Bâli vakfına ve bir tarafı Ömer Ağa mülküne ve bir tarafı süknâsı mescid-i mezbûr imâmına mevkūf olan menzile ve bir tarafı tarîk-i âmma müntehî ve tûlen on üç ve arzen üç zirâ‘ olan arsanın bir zirâ‘ı zikri sâlif Kâtib Bâli Vakfı’nın damlalığı ve iki zirâ‘ı merhûm-ı mezbûr Ali Paşa-yı cedîd vakfında iken, sâbıkan imâm olup vefât eden Mehmed Efendi arsa-i merkūme üzerine fuzûlen bir küçük şehnişin ihdâs etmekle, hâlâ mezkûr Habib Efendi dahi imâm olmakla fuzûlen tasarruf etmeğin, savb-ı şer‘-i şerîfden üzerine nâ’ib ve mi‘mâr getirip vech-i merkūm üzre bir zirâ‘ı Kâtib Bâli Vakfı damlalığı ve iki zirâ‘ı Ali Paşa-yı cedîd Vakfı idiği, udûl-i Müslimînden cemm-i gafîr ve cem‘-i kesîr ihbâr edip, mûcebince yedimize hüccet almış idik nazar olunup, zikr olunan şehnişin kal‘ olunmasını taleb ederiz deyip, merâmlarını nâtık hüccet ibrâz edip nazar olundukda, takrîr-i meşrûhlarına muvâfıka ve mutâbıka bulunmağın, mûcebi ile arsa-i merkūme üzerinde ihdâs olunan şehnişinin kal‘ına emr ve tenbîh olunup, mâ hüve’l-vâki‘ gıbbe’t-taleb ketb ve yed-i tâlibe def‘ olundu. Tahrîren fi’l-yevmi’l-âşir min [şehri] Cemâziyelevvel li sene seb‘a ve ışrîn ve elf. Şuhûdü’l-hâl: İbrahim b. Ahmed, Piyâle b. Abdullah, Müstedam b. Abdullah, Hasan Beşe b. Abdullah er-râcil, Hacı Ali b. Abdullah el-kethüdâ, Mehmed b. Timur, Hasan b. Veli ve gayruhüm.