İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 227 Hüküm no: 293 Orijinal metin no: [32b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hacı Mustafa’nın terekesinin olmadığı Mahmiye-i Kostantıniyye mahallâtından Mirahor mahallesi sâkinlerinden olup debbâğlar tâ’ifesinden Yazıcı Mustafa b. Ferhad meclis-i şer‘-i şerîf-i şâmihü’l-imâdda, takrîr-i merâm edip, kıbel-i şer‘-i şerîfden husûs-ı âti’z-zikrin üzerine varılıp mahallinde istimâ‘ olunmasın taleb ederim dedikde, savb-ı şer‘-i şerîfden Mevlânâ Süleyman Efendi zeyl-i kitâbda mastûrü’l-esâmi olan Müslimîn ile irsâl olunup, üzerine varıp akd-i meclis olundukda, tâ’ife-i mezbûrdan merkūm Yazıcı Mustafa ve Bolulu Hacı ve Turabî ve Kurd Beşe b. Abdullah ve Sinan b. Eymür Şah ve Mehmed b. Mustafa ve Timur Hoca ve Ahîzâde ve el-Hâc Abdi Çelebi [ve] Balcı Osman ve Musa b. Muharrem Halîfe ve Hayrunnisâ ve mahalle-i mezbûre avârızı mütevellîsi olan el-Hâc Hüseyin ve merhûm el-Hâc Süleyman b. ( ) vakfına mütevellî olan Mehmed Efendi b. Ali nâm kimesneler meclis-i şer‘-i şerîfde, bundan akdem tâ’ife-i mezbûrenin yazıcıları olup mahalle-i merkūmede sâkin iken vefât eden Sarı Yazıcı demekle meşhûr olan el-Hâc Mustafa’nın zevce-i metrûkesi ve vârisesi olan işbu sâhibetü’l-kitâb Mü’mine bt. Mahmud nâm hâtun mahzarında üzerine her biri takrîr-i da‘vâ edip, müteveffâ-yı mezbûr zimmetinde deyn-i şer‘îden mezbûr Yazıcı Mustafa’nın iki yüz yirmi akçe ve mezbûr Bolulu Hacı bin beş yüz akçe ve mezbûr Ahî Turabî altı yüz elli akçe ve mezbûr Kurt Beşe b. Abdullah bin üç yüz yirmi yedi akçe ve mezbûr Sinan bin akçe ve merkūm Mehmed b. Mustafa bin üç yüz beş akçe ve mezbûr Timur Hoca bin üç yüz yirmi yedi akçe ve merkūm Ahîzâde bin beş yüz akçe ve merkūm el-Hâc Abdi Çelebi beş yüz elli beş akçe ve merkūm Balcı altı bin akçe ve merkūm Musa bin üç yüz akçe ve merkūm el-Hâc Süleyman Vakfı’nın mütevellîsi mezbûr Mehmed Efendi vakf-ı mezbûrdan yirmi dört bin akçe ve mahalle-i mezbûre avârızı mütevellîsi mezbûr el-Hâc Hasan vakf-ı mezbûrdan iki bin akçe ve merhûm Muharrem Halîfe dört bin akçe ve merkūme Hayrunnisâ sekiz bin akçe hakkımız olup fevt oldukda, düyûn-ı mesfûre zimmetinde kalmışdır. Zevcesi mesfûre Mü’mine Hâtun müteveffâ-yı mesfûre yine cevâbında, fi’l-vâki‘ düyûn-ı mesfûreyi müteveffâ-yı mezbûre zevcesi olduğunu i‘tirâf edip, lâkin müteveffâ-yı mesfûr müflisen fevt olmuşdur, terekesinden bir habbeye vaz‘-ı yed eylemedim deyip, mezbûrûndan da‘vâlarını müsbite beyyine taleb olundukda, ityân-ı beyyineden âciz olduklarında, mezbûre Mü’mine müteveffâ-yı mezbûrun terekesine vaz‘-ı yed eylemediğine tahlîf olunmak matlûbumuzdur dediklerinde, gıbbe’l-istihlâf alâ mâ hüve’l-mes’ûl half billâhi’l-aliyyi’l-azîm edip, mevlânâ-yı müşârun-ileyh mahallinde tahrîr edip, alâ vukū‘ihi meclis-i şer‘de inhâ etmeğin, mâ hüve’l-vâki‘ ketb olundu. Tahrîren fî evâili Cemâziyelevvel li sene seb‘a ve ışrîn ve elf. Şuhûdü’l-hâl: Ali Bey b. Mehmed, Mehmed Halîfe b. el-Hâc Bayram, Ahmed Çavuş b. Abdullah el-mübâşir ve gayruhüm.