İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 228 Hüküm no: 294 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nurşah Hâtun’un mehir olarak eşinden Hırvat asıllı bir câriye aldığı Mahmiye-i İstanbul’da Kızıltaş mahallesi sâkinelerinden fahrü’l-muhadderât Nurşah Hâtun bt. Bâli Çavuş tarafından husûs-ı âti’z-zikre vekîl olup, hasm-ı şer‘î-i câhid mahzarında mezbûreyi ma‘rifet-i şer‘iyye ile ârifeyn olan Cafer b. Musa ve Ahmed b. Derviş şehâdetleriyle şer‘an vekâleti sâbite olan Mehmed Halîfe b. Fazlullah meclis-i şer‘-i şerîfde, merkūmenin zevci olan fahrü’l-emâsil ve’l-a‘yân Sinan Çavuş b. ( ) mahzarında takrîr-i kelâm edip, müvekkilem mezbûre Nurşah Hâtun zevcim merkūm Sinan Çavuş zimmetinde ma‘kūdun-aleyh olan yirmi bin akçe mehr-i müeccelim mukābelesinde, mukaddemâ Hırvadiyyetü’l-asl Himâye bt. Abdullah ve Eğlence bt. Abdullah nâm câriye ahz u kabz etdim, zevcim mezbûrun zimmetinde mehrimden bir akçe ve bir habbe bâkī kalmamışdır. Ve bundan mâ‘adâ kalîl ve kesîr ve celîl ve kasîr her ne var ise zevcim mezbûrun mülküdür. Benim aslâ ism-i mâl ıtlâk olunur bir şey’im yokdur, bi emrillâhi te‘âlâ ben vefât edersem, karındaşım Murad Çavuş ve sâir akrabâya intikāl eder mâlım yokdur, zevcim mezbûr Sinan Çavuş’ı kimesne rencîde etmeye dedikde, vekîl-i mezbûru ikrâr-ı meşrûhunda el-mukarru lehü’l-mezbûr bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fî evâili Cemâziyelevvel li sene seb‘a ve ışrîn ve elf. Şuhûdü’l-hâl: Fahrü’l-a‘yân İbrahim Ağa, Habib Efendi b. el-imâm, Mustafa Çelebi b. Mehmed el-müezzin, Mehmed b. Fazlullah, Süleyman b. Abdullah, Murad b. Mehmed, Mustafa b. Cafer, Ahmed b. Hüsrev, Hacı Bektaş Çavuş b. Ali ve gayruhüm.