İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 229 Hüküm no: 295 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saatçi Ahmed Bey’in vakfettiği evin, vakıf şartlarına uygun kullanılması Eshâb-ı hayrâtdan Sâatci Ahmed Bey mahmiye-i İstanbul’da Akseki mahallesinde vâki‘ bir tarafdan Ali Beşe mülkü ve bir tarafdan beytü’l-mâlci odaları demekle ma‘rûf odalar ile ve bir tarafdan tarîk-i âm ile mahdûd olup, bir bâb tahtânî beyti ve bir sofayı ve bi’r-i mâ’yı ve kenîfi ve muhavvatayı müştemil olan menzilini, hâl-i sıhhatinde vakf edip, süknâsını her sene mahalle-i mezbûre mescidine kırk beş akçe mum alıvermek üzre, ulemâdan bir recül-i sâlihe şart ettiği menzil-i mezkûrede Ali Beşe nâm râcil hilâf-ı şart-ı vâkıf sâkin olduğu sikāt ihbârıyla zâhir ve mübeyyen olup, işbu râfi‘ü’l-kitâb fahrü’s-sâdât es-Seyyid Mustafa Efendi b. es-Seyyid Ziyaeddin âlim ve sâlih ve mütedeyyin ve meskene ihtiyâc olduğu bâhir ve müte‘ayyin olmağın süknâ bir menzil-i mezbûr merkūm es-Seyyid Mustafa Efendi’ye ber-mûceb-i şart-ı vâkıf kıbel-i şer‘-i hatîrden tavsiye olunup zabt ve tasarrufu için bu vesîka-i enîka ketb ve terkīm ve yedine def‘ ve teslîm olundu. Lede’l-hâce müzekkeri mâ cerâ ola. Hurrire fi’l-yevmi’s-sânî aşer min şehri Cemâziyelevvel li sene seb‘a ve ışrîn ve elf. Şuhûd[ü’l-hâl]: el-Hâc Ali b. Abdullah kethüdâ-yı muhzır bey, Mustafa Çelebi b. ( ), Mehmed b. Hızır ve gayruhüm.