Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 150 Hüküm no: 123 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime bt. Yusuf’un menzilinin yarısını kızı Ümmühani’ye satması Mahmiye-i İstanbul hısnı ebvâbından Topkapısı dâhilinde Fâtıma Sultan mahallesinde sâkine Alime bt. Yusuf nâm hatun tarafından husûs-ı âti’l-beyâna vekîl olup vekâleti mahalle-i mezbûre sükkânından zâtını ma‘rifet-i şer‘iyye ile ârifân Hasan Çelebi b. Mustafa ve el-Hâc Hüseyin b. el-Hâc Şa‘bân nâm kimesneler şehâdetleri ile şer‘an sâbite olan İmam Mehmed Efendi b. Hasan nâm kimesne meclis-i şer‘-i şerîfde müvekkile-i mezbûrenin sadriye kebîre kızı bâ‘isetü hâze’l-kitâb Ümmühani bt. Mehmed nâm hatunun zevci ve tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân şâhidân-ı mezbûrân şehâdetleri ile şer‘an sâbite olan Mehmed Hoca b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Alime akd-i âti’z-zikrin sudûruna değin cümlesi yedinde mülkü ve hakkı olup mahalle-i mezbûrede vâki‘ bir tarafdan Hacı Mustafa mülkü ve bir tarafdan mahalle-i mezbûrede imâm olanlara meşrûta vakıf menzil ve bir tarafdan Fâtıma Sultan Vakfı olan menzil ve bir tarafdan tarîk-i âm ile mahdûd büyût-ı adîde ve hadîkayı müştemil menzilinin hudûdundan Fâtıma Sultan Vakfı ile imâma meşrûta menzil [26a] tarafında vâki‘ bir bâb fevkānî oda ve bahçe ve kenîfi müştemil nısf-ı müfrezi kızı müvekkile-i mezbûreye tarafeynden îcâb ve kabûlü hâvî bey‘-i kat‘î ile on bin akçeye bey‘ ve teslîm ol dahi iştirâ ve tesellüm eylediğinden sonra semen-i mezbûrdan kızı müvekkile-i mezbûrenin zimmetini ibrâ ve iskāt eyledim, min-ba‘d menzil ve mahdûd-ı mezbûrun nısf-ı müfrez-i mezbûru müvekkile-i mezbûre Ümmühani’nin mülk-i müşterâsıdır keyfe mâ yeşâ ve yahtâr mutasarrıfe olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’l-hadî ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Derviş Bey b. Rıdvan, Ahmed Beşe b. Mustafa, Hüseyin Bey b. Saraç, Arslan Beşe b. Ahmed.