Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 151 Hüküm no: 124 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un Solak Ali Çelebi aleyhindeki alacak davasından men olunması Efendi hazretleri imzâsıyladır Hüccet-i isbât-ı ibrâ ve mu‘ârazadan men‘ Mahrûse-i Galata muzâfâtından kasaba-i Fındıklı’da Molla Çelebi mahallesi sâkinelerinden Hadîce Hatun b. Mustafa tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân mahalle-i mezbûre sükkânından Ahmed Bey b. Murad ve mahmiye-i İstanbul’da Yayla Yokuşu kurbünde Uzun Yusuf mahallesi sükkânından Ramazan Ağa b. Mustafa nâm kimesneler şehâdetleri ile şer‘an sâbite olan İsmail Çelebi b. Mehmed nâm kimesne meclis-i şer‘-i şerîfde işbu bâ‘isetü’l-kitâb Solak Ali Çelebi b. Abdurrahman nâm kimesne mahzarında üzerine da‘vâ ve takrîr-i kelâm edip müvekkilem mezbûre Hadîce Hatun bundan akdem bir çift mücevher altın bileziğini bey‘ edivermek için mezbûr Ali Çelebi’ye def‘ ve teslîm, mezbûr Ali Çelebi dahi ahz u kabz ve altı bin esedî guruşa âhara bey‘ ve teslîm ve semeni olan meblağ-ı mezbûr altı bin esedî guruşu kabz etdiğinden sonra semen-i mezbûrun beş bin yedi yüz esedî guruşunu müvekkileme def‘ ü teslîm, müvekkilem dahi ahz u kabz edip bâkī üç yüz esedî guruşu bi-gayr-ı hakkın mesârifine sarf edip zimmetinde deyn olmağla suâl olunup meblağ-ı bâkī-i mezbûrun mezbûr Ali Çelebi’den tazmîn olunup alıverilmesi matlûbumdur dedikde, gıbbe’s-suâl mezbûr Ali Çelebi semen-i mezbûr altı bin esedî guruşun üç yüz guruşu mesârifime sarf ve bâkī beş bin yedi yüz esedî guruşunu müvekkile-i mezbûreye def‘ ü teslîm, müvekkile-i mezbûre dahi ahz u kabz etdikde vech-i muharrer üzere mesârifime sarf ile deynim olan üç yüz esedî guruşdan zimmetimi ibrâ-i âm ile ibrâ ve iskāt etmiş idi deyü def‘le mukābele edicek gıbbe’s-suâl ve’l-inkâr mezbûr Ali Çelebi’den def‘-i mezbûrunu mübeyyine beyyine taleb olundukda mahmiye-i mezbûrede Saray-ı atîk-i Sultânî kurbünde Molla Gürânî mahallesi sükkânından Mustafa Çelebi b. Ahmed ve Aşıkpaşa mahallesi sükkânından Sefer Efendi b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ali Çelebi semen-i mezbûr altı bin esedî guruşun beş bin yedi yüz esedî guruşunu müvekkile-i mezbûreye teslîm müvekkile-i mezbûre dahi ahz u kabz etdikde semen-i mezbûrdan bâkī üç yüz esedî guruşdan mezbûr Solak Ali Çelebi’nin zimmetini bizim huzûrumuzda ibrâ-i âmm-ı kâtı‘u’n-nizâ‘ ile ibrâ ve iskāt etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i muharrer üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Mustafa Beşe el-mübâşir, Arslan Çavuş b. ( ), Mehmed Çavuş b. Osman, Çukadar Hüseyin Beşe b. Hızır Efendi.