Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 152 Hüküm no: 125 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un neslinden kimse kalmadığından vakıf menzilinin Şaban Çelebi’ye tahsis olunması Efendi hazretleri imzâsıyladır. Hüccet-i tevcîh-i beyt Ashâb-ı hayrâtdan merhûme Fâtıma Hatun bt. Ali’nin vakfiye-i ma‘mûlün-bihâsı nâtıka olduğu üzere süknâsı evvelâ nefsine ba‘dehâ ile’l-inkırâz evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz utekāsına ve utekā-yı utekāsına ve utekāsının evlâdına ve evlâd-ı evlâdına ve ba‘de’l-inkırâz kırâet-i Kur’ân-ı azîmü’ş-şâna kādir bir recül-i sâliha meşrûta vakfı olup mahmiye-i İstanbul’da Haraccıbaşı mahallesinde vâki‘ bir tarafdan Mehmed Beşe mülkü ve bir tarafdan Ahmed Ağa mülkü ve bir tarafdan diğer Ahmed Ağa menzili ve bir tarafdan tarîk-i âm ile mahdûd olup tahtânî bir bâb oda ve bir sofa [26b] ve bir su kuyusu ve kenîfi müştemil menzilde meşrûtiyet üzere sâkin olanlar fevt olup sulehâya gelince meşrûtün-lehümden kimesne kalmayıp süknâ-i menzil-i mezbûr mahlûle ve sulehâdan işbu râfi‘ü’l-kitâb Şa‘bân Çelebi b. Mustafa her vechile mahall olmağın süknâ-i menzil-i mezbûru ber-mûceb-i şart-ı vâkıfe-i mezbûre Şa‘bân Çelebi’ye tevcîh olunup tasarrufu için bu vesîka-i enîka ketb olundu. Fi’l-yevmi’s-sâbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Feyzullah Efendi b. Ahmed, Mustafa Çelebi b. Ahmed, Hasan Efendi el-kādı, Yusuf b. Oruç, Hasan Çelebi muhzır, Veli beşe el-muhzır.