İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 254 Hüküm no: 341 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıp olan Ali b. Ali’nin mallarını korumak ve oğlu Ahmed’in işlerini görmek üzre Muharrem b. Burhaneddin’in kayyım tayin edilmesi Mahmiye-i İstanbul’da Yazıcı mescidi mahallesi sâkinlerinden iken, müddet-i medîd gāib ve nâ-bedîd olan Ali b. Ali’nin sulbî oğlu Ahmed nâm sagīrin umûrunu tesviye ve gāib-i mezbûrun emvâlin zabt için, mu‘temedün-aleyh ve mevsûkun-bih bir kimesne kıbel-i şer‘-i şerîfden nasb olunması lâzım ve mühim eyledikde, işbu hâmilü’l-kitâb Muharrem b. Burhaneddin diyânet ile ma‘rûf ve istikāmet ile ma‘rûf kimesne olup, hizmet-i mezbûre uhdesinden gelmeye kādir idiğin sikātdan olup zeyl-i kitâbda mastûrü’l-esâmi olan Müslimîn haber vermeğin, mezbûr Muharrem sagīr-i mezbûrun umûrun tesviye ve gāib-i mezbûrun emvâlin zabt için cânib-i şer‘-i şerîfden emîn nasb ve ta‘yîn olunup, bu hurûf ketb olunup, yedine def‘ olundu. Tahrîren fi’l-yevmi’l-hâdî ve’l-ışrîn min Cemâziyelevvel li sene 1027. Şuhûd[ü’l-hâl]: Ramazan b. Abdi, Himmet b. Durak, Ahmed b. Mehmed, Hacı Mustafa b. Zeynelâbidin, Abdünnebî b. Edhem, Şaban b. Abdünnebî çavuş, Ahmed b. Bayram, Hızır b. Ahmed el-muhzır ve gayruhüm.