İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 254 Hüküm no: 342 Orijinal metin no: [38a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun Vakfına ait evin bir bölümünün Sinan Efendi b. Mehmed’e tahsis edilmesi Mahmiye-i İstanbul’da Yakub Ağa mahallesinde vâki‘ bir tarafı Yakub Ağa Vakfı ve bir tarafı tarîk-i hâs ve bir tarafı tarîk-i âm ile mahdûd olup, muhavvata-i dâhiliyesi büyût-ı müte‘addide ve kenîfi ve muhavvata-i hâriciyesi üç bâb süflâ beyti ve kenîfi müştemil olan menzili, mâlikesi olan Rahime Hâtun nâm sâhibetü’l-hayr vakf edip, süknâsını rûhiyçün yevmî iki Yâsin-i şerîf tilâvet etmek üzre ahvec ulemâya şart edip, lâkin menzil-i mezbûr vasî olmakla içeri muhavvatasında bir kimesne sâkin olup ve taşra havlusunda bir âhar kimesne sâkin olageldiği zeyl-i kitâbda mastûrü’l-esâmi olan Müslimîn ihbâr edip, işbu râfi‘ü’l-kitâb Mevlânâ Sinan Efendi b. Mehmed âlim ve sâlih ve mütedeyyin ve meskene etemm-i ihtiyâcla muhtâc idiği zâhir ve mütebeyyin olmağın, tarîk-i tarafeyn olup üç bâb beyti ve kenîfi müştemil olup, başka kapısı olan muhavvata-i hâriciye yevmî iki Yâsin-i şerîf tilâvet etmek üzre kıbel-i şer‘den mezbûr Sinan Efendi’ye tevcîh olunup, zabt ve tasarrufiyçün bu vesîka-i enîka ketb ve terkīm ve yedine def‘ ve teslîm olundu. Lede’l-hâce ihticâc edine. Hurrire fî evâsıtı Cemâziyelevvel li sene seb‘a ve ışrîn ve elf. Şuhûd[ü’l-hâl]: Hacı Efendi b. Numan, Mehmed Efendi b. Ahmed, es-Seyyid Nasrullah Efendi, Muharrem Efendi, Muharrem Ağa, Mustafa Ağa. Derkenâr: Bunlar ile cümle şâhid oldu, bizden cümle dahi ola.