İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 255 Hüküm no: 343 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife b. Cemaleddin’in, öldükten sonra mallarının satılarak parasıyla adına hacca gidilmesini vasiyet etmesi Husûs-ı âti’t-takrîr mahallinde ketb ü tahrîr olunmak için kıbel-i şer‘-i hatîrden adam taleb olundukda, Mevlânâ Receb Efendi irsâl olunup, ol dahi zeyl-i kitâbda mastûrü’l-esâmi olan Müslimîn ile mahmiye-i İstanbul’da merhûm Şehzâde Sultan Mehmed Hân mahallesine varıp akd-i meclis-i şer‘î ettikde, vilâyet-i Anadolu’da Burdur kazâsına tâbi‘ Lenkemi nâm karye sâkinlerinden Mehmed Halîfe b. Cemaleddin meclis-i mezbûrda ammî oğlu el-Hâc Himmet b. Receb nâm kimesne muvâcehesinde takrîr-i kelâm edip, vefâtımdan sonra işbu bir mor çuka ferâce ve bir köhne dolama ve çuka çakşır ve bir mukaddem kuşak ve bir yeşil inâyet kaftan ve bir kürdiye ve bir köhne kebe ve iki aded velençe ve bir köhne yağmurluk ve dört aded sahanımı bey‘ edip, semenini techîz ve tekfîn ve sâir husûsuma sarf edip, ba‘dehû karye-i mezbûre sükkânından Cafer b. Mustafa nâm kimesne zimmetinde cihet-i karzdan olan on altı bin akçemi mezbûr Cafer Bey’den ahz u kabz ettikden sonra, merkūm el-Hâc Himmet ya bizzat kendileri ve yahud bir sâlih ve mütedeyyin kimesneye verip, benim için hacc-ı şerîf edip sevâbın rûhuma ihdâ ettireler deyû vasiyyet etdim ve zikr olunan vesâyâmı tenfîze mersûm el-Hâc Himmet’i vasî-yi muhtâr nasb eyledim dedikde, merkūm el-Hâc Himmet dahi vesâyet-i merkūmeyi kabûl ve hizmet-i lâzımesini edâya müte‘ahhid olduğun, mevlânâ-yı mezbûr mahallinde tahrîr edip, ba‘dehû gelip mahfil-i kazâda haber vermeğin, mâ hüve’l-vâki‘ ketb olundu. Tahrîren fi’l-yevmi’s-sâlis ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Bâli Efendi b. Ahmed, es-Seyyid Ali b. es-Seyyid Nebi, el-Hâc Resûl b. Mustafa, el-Hâc Veli b. Süleyman.