İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 256 Hüküm no: 344 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hoca Hayreddin vakfı vergileri mültezimi Mahmud Çelebi b. Derviş’in zimmetindeki paranın kefîli Ali Çelebi b. Şeyh Bâli’den tahsil edilmesi Merhûm Hoca Hayreddin vakfına berât-ı pâdişâhî ile mütevellî olan râfi‘ü’l-kitâb Hüseyin Bey b. Abdullah meclis-i şer‘-i şerîfde, Ali Çelebi b. eş-Şeyh Bâli muvâcehesinde takrîr-i da‘vâ edip, bundan akdem vefât eden Mahmud Çelebi b. Derviş’e vakf-ı mezbûrun kurâsından Vize kazâsına tâbi‘ Ahmed Beylü nâm karye ve Urla kazâsına tâbi‘ Kara Yusuflu nâm karyelerin vakf-ı mezbûra âid olan a‘şâr-ı şer‘iyye ve rüsûm-ı örfiyye ve cürm ü cinâyet ve bâd-ı hevâsına bin yirmi beş senesi Martı ibtidâsından sene tamamına değin, hayâtı [hayât-ı] hâlinde yetmiş bin akçeye der-uhde ettiğimden sonra, meblağ-ı merkūmun otuz beş bin akçesine ber vech-i peşîn hâl-i hayâtında merkūm Mahmud Çelebi yedinden kabz edip, şer‘an zimmetine lâzım gelen meblağ-ı bâkī yirmi dokuz bin beş yüz akçeye mersûm Ali Çelebi emir ve kabûlü hâviye kefâletle kefîl olmuş idi. Lâkin meblağ-ı merkūm yirmi dokuz bin beş yüz akçenin dahi yirmi dört bin akçesine mezbûr Mahmud Çelebi yedinden kable’l-vefât istîfâ ve kabz etdim. Meblağ-ı bâkī beş bin beş yüz akçeyi kefâleti hasebiyle mersûm Ali Çelebi’den taleb ederim dedikde, gıbbe’s-suâl mersûm Ali kefâlet-i mezbûreyi ikrâr edip, lâkin hâl-i hayâtında meblağ-ı merkūm yirmi dokuz bin beş yüz akçeyi mersûm Mahmud Çelebi müdde‘î-i merkūma bi’t-tamâm edâ etmişdir deyip, mezkûr Hüseyin Bey yirmi dört bin akçeden ziyâde aldığını inkâr edicek, merkūm Ali Çelebi’den sıdk-ı makāline beyyine taleb olundukda, ityân-ı beyyineden âciz olup, mezbûr Hüseyin Bey meblağ-ı merkūmu bi’t-tamâm istîfâ etmediğine yemîn teklîf olundukda, alâ vefk-i mes’ûlihî yemîn billâhi’l-aliyyi’l-azîm etmeğin, mûcebiyle hükm olunup, mâ vaka‘a gıbbe’t-taleb ketb olundu. Tahrîren fî evâhiri Cemâziyelevvel min şuhûri sene seb‘a ve ışrîn ve elf. Şuhûd[ü’l-hâl]: Murad b. Mehmed, Mehmed b. Ahmed, Hüseyin b. Cafer, Ahmed b. Ömer.