İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 256 Hüküm no: 345 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva Hâtun’un tasarrufundaki vakıf ev ile ilgili temessük kaydı Mahmiye-i İstanbul’da Aksaray nâm mevzi‘a karîb merhûm Koğacı Dede mahallesi sâkinelerinden, râfi‘atü hâze’l-kitâb Havva Hâtun bt. ( ) meclis-i şer‘-i şerîfde takrîr-i kelâm edip, merhûm-ı mezbûr vakfından mahalle-i mersûmede vâki‘, bir tarafı vakf-ı mezbûr ve bir tarafı Nefise Hâtun Vakfı ve bir tarafı tarîk-i âm ile mahdûd olup, bir bâb fevkānî ve bir bâb tahtânî beyti müştemil olan menzilin mutasarrı[fı] zevcim Ketenci fevt oldukda, menzil-i merkūmu vakf-ı mezkûr mütevellîsi olan Şaban b. Hüseyin bana yevmî bir akçe icâre-i müeccele ile îcâr edip ve kendi mâlımla binâ ettiğim her ne mikdâr olursa hayâtta oldukça cânib-i vakıfdan icâre-i mu‘acceleye mahsûb olup, vefâtımdam sonra vakfa mülhak olmak üzre izin vermeğin, ben dahi altı bin akçe harc ve sarf edip ba‘zı binâ ihdâs etmişdim. Hâlâ mütevellî-i mezbûr vech-i mesfûr üzre hatt-ı vasiyyetimi müştemil tezkere verdi, mûcebince istihkâmen kıbel-i şer‘den dahi temessük verilmesini taleb ederim deyû yedinde olan tezkereyi ibrâz edip nazar olundukda, mazmûnu takrîrine muvâfık olmağın, bu hurûf li ecli’t-temessük ketb olundu. Tahrîren fi’l-yevmi’s-sâdis ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Kıdvetü’l-muhakkikīni’l-kirâm Mehmed Efendi b. Mehmed, Fahrü’l-akrân Muzaffer Ağa b. Abdullah Reîsü’l-muhzırîn, Fahrü’l-a‘yân Yusuf Çavuş b. Abdülmennân.