Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 153 Hüküm no: 127 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Ağa’nın varislerinden Fatıma’nın diğer varis Safiye aleyhindeki miras davasında anlaşma sağlanması Hüccet-i havâle Mahmiye-i İstanbul’da Şehremîni kurbünde Cafer Ağa mahallesinde sâkin iken bundan akdem vefât eden Ali Ağa b. Kasım’ın verâseti zevce-i metrûkesi Fâtıma bt. Abdullah ile sulbiye kebîre kızı Safiye nâm hatunlara münhasıra olduğu şer‘an sâbit oldukdan sonra mezbûre Fâtıma Hatun zâtını ma‘rifet-i şer‘iyye ile ârifân olup mahalle-i mezbûre ahâlîsinden İmam İshak Efendi b. Yusuf ve Müezzin Mahmud Halîfe b. Muharrem nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde müteveffâ-yı mezbûrun terekesine vâzı‘atü’l-yed olan bâ‘isetü’l-kitâb mezbûre Safiye’nin zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân el-Hâc Hüseyin b. Abdüllatif ve Ali Bey b. Mehmed nâm kimesneler şehâdetleriyle şer‘an sâbite olan İsmail Çelebi b. Ahmed nâm kimesne mahzarında ikrâr ve takrîr-i kelâm edip müvekkile-i mezbûreye bundan akdem yedinden ikrâz ve kabz etmekle zimmetimde yüz yirmi beş esedî guruş deynim olup ve müteveffâ-yı mezbûrun dahi Van Beylerbeyisi olan Ali Paşa zimmetinde deyn-i şer‘îden bin esedî guruş hakkı olmağla mezbûre Safiye’yi deyn-i mezbûrum yüz yirmi beş esedî guruş için müteveffâ-yı mezbûrun mûmâ-ileyh Ali Paşa zimmetinde hakkı olan bin guruşdan hissem olan yüz yirmi beş guruşu almak üzere mûmâ-ileyh Ali Paşa üzerine havâle-i sahîha-i şer‘iyye ile havâle edip ve müteveffâ-yı mezbûr zimmetinde cihet-i karzdan hakkım olan beş yüz esedî guruşu müteveffâ-yı mezbûrun tereke-i vâfiyesinden ver deyü bundan akdem mezbûre Safiye’den da‘vâ, ol dahi inkâr etmekle ba‘de’n-nizâ‘ muslihûn tavassut edip mezbûr Safiye ile beynimizde üç yüz esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç yüz esedî guruşu mezbûre Safiye tereke-i müteveffâ-yı mezbûrdan bana tamâmen verip ben dahi ahz u kabz edip tereke ve yedinden mütehallis oldukdan sonra müteveffâ-yı mezbûrun bâkī akār ve menkūl ve esâs-ı beyt ve evânî-i nühâsiye ve gayr-ı nühâsiye kalîl ü kesîr [ve] celîl ü hakīr cemî‘ terekesinden sekiz sehmden bir sehm hissem olan bir sehmi mukābelesinde mezbûr Safiye ile şerâit-i sıhhat-i sulhü hâvî ve mevâni‘den ârî bi-tarîkı’t-tehârüc üç yüz yetmiş beş guruşa sulh olup sulh-ı mezbûra bedel olan meblağ-ı mezbûr üç yüz yetmiş beş esedî guruş dahi müvekkile-i mezbûre Safiye yedinden ahz u kabz etdiğimden sonra tereke-i müteveffâ-yı mezbûra müte‘allıka âmme-i hukūk-ı ma‘lûme ve mechûle da‘vâsından mezbûre Safiye’nin zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Musa Efendi b. İlyas el-imâm, Şa‘bân Efendi b. Ahmed el-imâm, Kenan Bey b. Abdülmennan, el-Hâc Ahmed b. Ali, Abdurrahman Çelebi b. Abdullah, Mehmed b. Ramazan, Ramazan Beşe ser-oda.