Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 154 Hüküm no: 128 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un sakin olduğu vakıf menzilden feragat etmesi Hüccet-i tevcîh-i menzil, imzâ-i efendi Ashâb-ı hayrâtdan merhûme Fâtıma bt. Sinan nâm hatunun süknâsı fukarâ ve sulehâya meşrûta vakfı olup Silivrikapısı’nda üç tarafdan Bali Ağa Vakfı ve bir tarafdan tarîk-i âm ile mahdûd bir bâb tahtânî oda ve bir sofa ve bir kenîf ve bir su kuyusu ve bir mikdâr bahçeyi müştemil menzile mutasarrife olan Havva bt. Hasan Efendi nâm hatun meclis-i şer‘de takrîr-i kelâm ve bast-ı merâm edip menzil-i mezbûr benim tasarrufumda olup bu âna değin sâkine olmuş idim, el-hâletü hâzihi benim vüs‘atim olmağla menzil-i mezbûrdan kendi rızâmla kasr-ı yed eylerim dedikde menzil-i mezbûr fukarâdan olup her vechile mahal ve müstahık olduğu hâkim-i muvakkı‘-ı kitâb hazretleri huzûrunda zâhir ve nümâyân olan râfi‘u hâze’l-vesîka Çizmeci Mehmed b. Mustafa’ya ber-mûceb-i şart-ı vâkıfe tevcîh olunup tasarrufu için işbu vesîka ketb olundu. Fi’l-yevmi’l-hâmis min-Cumâdelâhire li-sene ihdâ ve semânin ve elf. Şuhûdü’l-hâl: Mustafa Efendi b. eş-Şeyh Mehmed el-müderris, Hasan Çelebi b. Uğurlu, Ahmed Efendi b. Mehmed Efendi, Ali Efendi el-kādı, Mehmed Ağa b. Abdurrahman, Musli Çelebi b. ( ), Şükrullah b. Mustafa ve gayruhum.