Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 155 Hüküm no: 129 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırkbeşinci Bölük Çorbacılarından Musli Ağa’nın vefat eden Kirkor’da kalan alacağının terekeden tahsil olunması Hüccet, ikrâr-ı deyn, isbât Mahmiye-i İstanbul’da Laleli Çeşme kurbünde Ahmed Ağa mahallesi sükkânından olup Dergâh-ı âlî yeniçerilerinden Kırkbeşinci Bölük’de Çorbacı olan bâ‘isü hâze’l-kitâb Musli Ağa b. Abdülvahab nâm kimesne meclis-i şer‘-i şerîfde mahmiye-i mezbûrede eski odalar başında vâki‘ Ferhad Paşa fırınında ekmekçi iken bundan akdem hâlik olan Ergiri Kasrılı Kirkor v. Kigo’nun veresesinden tereke-i vâfiyesine vâzı‘atü’l-yed olan sulbiye kebîre kızı Solto nâm zimmîye muvâcehesinde üzerine da‘vâ ve takrîr-i kelâm edip cihet-i karzdan hâlik-i mezbûr zimmetinde iki yüz esedî guruş hakkım olup hattâ hâlik-i mezbûr hayâtında cihet-i mezbûreden zimmetinde bana vâcibü’l-edâ iki yüz esedî guruş deyni olduğunu ikrâr dahi etdikden sonar kable’l-edâ hâlik olup zimmetinde kalmağın suâl olunup tereke-i vâfiyesinden edâya mezbûre Solto’ya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübebeyyine beyyine taleb olundukda mahalle-i mezbûre sükkânından İmam Şa‘bân Efendi b. Abdurrahman ve Kızıltaş mahallesi sükkânından el-Hâc Musli Ağa b. Abdülmennan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr Kirkor hayâtında müdde‘î-i mezbûra cihet-i karzdan zimmetinde vâcibü’l-edâ iki yüz esedî guruş deyni olduğunu bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr dahi tahlîf-i şer‘î tahlîf olundukdan sonra mûcebince meblağ-ı mezbûr iki yüz esedî guruşu hâlik-i mezbûrun tereke-i vâfiyesinden müdde‘î-i mezbûra edâya mezbûre Solto üzerine hükm ve kazâ olunmağın mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, Abdi Çelebi b. Hüseyin, Mustafa Çelebi b. Ahmed, Mehmed b. Ramazan.