Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 156 Hüküm no: 130 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmâl Emini Mehmed Ağa’nın vefat eden İsmihan Hatun’un terekesinden dolayı eşi Musli Ağa aleyhindeki miras davasından men olunması Efendi hazretleri imzâsıyladır Hüccet-i yemîn Dârü’l-hilâfeti’l-aliyye Kostantıniyyetü’l-mahmiye’de Laleli Çeşme kurbünde Ahmed Ağa mahallesinde sâkin iken bundan akdem vefât eden İsmihan Hatun bt. Oruç Ağa’nın zevc-i metrûku Musli Ağa b. Abdullah’dan gayrı vârisi olmamağla terekesinin nısfı irsen mezbûr Musli Ağa’ya intikāl edip ve nısf-ı âharı taraf-ı beytülmâle âid olduğu şer‘an sâbit oldukdan sonra hâlâ mahmiye-i mezbûrede hâssa beytülmâl emîni olan Mehmed Ağa b. Ahmed nâm kimesne meclis-i şer‘-i şerîfde bâ‘isü hâze’l-kitâb mezbûr Musli Ağa mahzarında üzerine da‘vâ ve takrîr-i kelâm edip mezbûr Musli Ağa müteveffât-ı mezbûrenin terekesinden defter-i kassâmda tahrîr olunan eşyâdan mâ‘adâ bir sîm kemer kuşak ve bir çift altın bilezik ve bir çift zümrüd küpe ve bir la‘l yüzük ahz ve ihfâ eylemişdir, suâl olunup eşyâ-i mezbûrenin a‘yânı mevcûde ise a‘yânının nısfı, istihlâk etdi ise misli olanının nısf-ı misli ve kıymeti olanın kıymetlerinin nısfı beytülmâl için mezbûr Musli Ağa’dan alıverilmesi matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müteveffât-ı mezbûrenin terekesinden olan eşyâ-i mezbûremi vech-i mübeyyen üzere ahz ve ihfâ etmeyip el-ân a‘yânından nısfını veyâ misli olanından mislinin ve kıymeti olanından kıymetlerinin nısfı beytülmâl için damân üzerlerine lâzım olmadığına mezbûr Musli Ağa’ya yemîn teklîf olundukda mezbûr Musli Ağa dahi alâ-vefki’l-mesûl yemîn billâhi’l-ale’l-a‘lâ [27b] etmeğin mûcebince müdde‘î-i mezbûr bilâ-beyyine vech-i mübeyyen üzere mu‘ârazadan men olunup mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: el-Hâc Hüseyin b. İbrahim, Mehmed Çelebi b. Abdullah, Ebubekir Çelebi b. Ömer, el-Hâc Yusuf b. Oruç, Mehmed Ağa b. Ali Efendi.