İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 281 Hüküm no: 386 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Okçubaşı Hayreddin Bey Vakfı’na ait evin Derviş Sadi b. Mehmed’e kiralandığı Mahmiye-i İstanbul’da merhûm-ı mağfiret-nişân Sultan Bayezid Hân -tâbe serâhu ve berede mesvâhu- hazretlerinin câmi‘-i şerîfi kurbunda Emir Bey mahallesinde vâki‘, merhûm Okçubaşı Hayreddin Bey vakf edip süknâsı utekāsına ba‘de’l-inkırâz îcâr olunup, ücretinden rûhiyçün huzûrunda eczâ-i şerîfe tilâvetine şart eylediği menzilin mütevellîsi olan hâfızu’l-kitâb Ahmed Çelebi b. Muharrem meclis-i şer‘-i şerîfde Derviş Sadi b. Mehmed mahzarında ikrâr ve takrîr-i kelâm edip, tafsîl-i mezkûr üzre vakf olup utekā münkariz olmakla, mahalle-i merkūmede vâki‘ bir tarafı Hasan Efendi mülküne ve bir tarafı Mehmed Bey nâm Yesârî mülküne ve bir tarafı vakf-ı mezbûra ve taraf-ı râbi‘i tarîk-i âmma müntehî olup, üç fevkānî odaları ve fevkānî bir sofayı ve müşterek su kuyusunu müştemil olan menzili tevâbi‘ ve levâhıkı ile târih-i kitâb şehri gurresinde üç sene tamamına değin yevmî beş akçe ücret-i müeccele ile mezbûr Derviş Sadi’ye tevliyyetim hasebiyle îcâr ve teslîm eyledim, mezbûr dahi vech-i merkūm üzre istîcâr ve tesellüm eyledi dedikde, mütevellî-i mezbûru ikrâr-ı meşrûhunda mezbûr Derviş Sadi dahi vicâhen ve şifâhen tasdîk ve vech-i sâbık üzre istîcâr ve tesellüm eylediğin tahkīk etmeğin, mâ hüve’l-vâki‘ gıbbe’t-taleb ketb ü tahrîr olunup, yed-i tâlibe def‘ olundu. Tahrîren fî evâili Cemâziyelâhir li sene seb‘a ve ışrîn ve elf. Şuhûd[ü’l-hâl]: Mustafa Beşe b. İvaz, Hasan b. Hüseyin, Ahmed b. Süleyman, Ali Dede b. Mehmed ve gayruhüm.