İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 282 Hüküm no: 387 Orijinal metin no: [43b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın Abdi b. Musa’ya verdiği ödünç parayı tamamen geri aldığı Ahmed b. Abdullah mahfil-i kazâda Abdi b. Musa mahzarında takrîr-i da‘vâ edip, mezbûr Abdi zimmetinde karz-ı şer‘îden sekiz bin akçem vardır taleb ederim dedikde, gıbbe’s-suâl mezbûr Abdi cevâb verip, zimmetimde vech-i merkūm üzre mezbûr Ahmed’in sekiz bin akçesi var idi. Lâkin bir def‘a üç bin akçe ve bir def‘a beş bin akçe cem‘an sekiz bin akçeyi mezbûr Ahmed’e def‘ ve teslîm etdim dedikde, mezbûr Ahmed meblağ-ı merkūmun üç bin akçesin kabz ettiğin mu‘terif olup, beş bin akçesin almadım deyû inkâr edip, mezbûr Abdi’den meblağ-ı merkūm beş bin akçeyi def‘ ve teslîm ettiğine beyyine taleb olundukda, ityân-ı beyyineden ızhâr-ı acz edip istihlâf edicek, mezbûr Ahmed dahi alâ vefki’l-mes’ûl yemîn billâhi te‘âlâ eyledikde, meblağ-ı merkūm beş bin akçe edâsına hükm olundukdan sonra, mezbûr Abdi meblağ-ı merkūm beş bin akçeyi meclis-i şer‘de merkūm Ahmed’e teslîm edip ol dahi bi tamâmihî tesellüm etmeğin, mâ vaka‘a gıbbe’t-taleb ketb olundu. Tahrîren fi’l-yevmi’r-râbi‘ min Cemâziyelâhir li sene seb‘a ve ışrîn ve elf. Şuhûd[ü’l-hâl]: Mehmed b. Timur, Mehmed b. Eyüb, Osman b. Abdullah, Ebûbekir b. Osman ve gayruhüm.