İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 283 Hüküm no: 389 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Büyük Kresava köylülerinin, İstanbul’daki köy ahâlîsinden vergileri tahsil için Mihal ve Nikola’yı vekil tayin etmeleri Rumeli’nde Yenişehir kazâsı müzâfâtından Fener nâhiyesinde vâki‘ Büyük Kresava nâm karye mahallâtından aşağı mahalle ahâlîsinden Yani v. Dimitri ve Anastas v. Mihal ve Yorgi v. Mihal ve Şiyo v. Mihal ve Dimitri v. Anastas ve Yorgi v. Varta ve Nikola v. Yorgi ve Şilo v. Dimitri ve Nikola v. İstemad ve Laho v. Yani ve Yorgi v. Dimitri ve Dimitri v. Todori ve Yorgi v. Dimitri ve Nikola v. Varta ve Mihal v. Niko ve Yorgi v. Uyar nâm zimmîler mahfil-i kazâda mahalle-i mezbûreden işbu râfi‘ü’l-kitâb Mihal v. İstemad ve Nikola v. İstemad nâm zimmîler muvâcehelerinde takrîr-i kelâm edip, bin on yedi senesinden bu âna gelince mahalle-i merkūme re‘âyâsı üzerine lâzım olan cizye ve tekâlîf-i örfiyye ve levâzım-ı zarûriyyesi için istidâne olunup kefîl olduğumuz meblağdan ehl-i mahalle-i mezbûre zimmetlerinde yüz kırk sekiz bin akçe bâkī kalmışdır. El-hâletü hâzihî meblağ-ı merkūmdan hâlâ mahalle-i merkūmede ve İstanbul’da olan mahalle-i merkūme re‘âyâsının her birinin zimmetine lâzım gelen düyûnu cem‘ [ve] tahsîl edip, ba‘dehû kasaba-i Kerbeneş sâkinlerinden Mehmed Beşe b. Abdullah nâm râcile olan otuz altı bin akçe ve Puşrik nâm kahveciye olan otuz bin ve Hasan Çavuş’a olan on dört bin akçe ve es-Seyyid Ahmed Efendi’ye olan sekiz bin dört yüz akçe cem‘an seksen sekiz bin akçe düyûn edâ ve teslîm edip temessük-i şer‘î alıp, mâ‘adâsı İstanbul’da olan duyûn için defteriyle getirip yedinden cevâbın vermeğe mezbûrân Mihal ve Nikola’yı vekîl ve mübâşir ve nâ’ib nasb eyledik ve ba‘de itmâmi’l-hizmet hizmetleri mukābelesinde mezbûrâna on iki bin akçe ücret vermeyi müte‘ahhid olduk dediklerinde, mezbûrân dahi vekâlet-i merkūmeyi kabûl ve hizmet-i lâzımesine müte‘ahhid olmağın, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâmin ve’l-ışrîn min Cemâziyelevvel li sene seb‘a ve ışrîn ve elf. Şuhûd[ü’l-hâl]: Ali b. Abdullah, Yusuf b. Ali, Mehmed b. Abdullah, Cafer b. Mustafa, Hızır Bâli b. Abdullah ve gayruhüm.