İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 283 Hüküm no: 390 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Resmî Evkâfı’ndan Ahmed Çelebi b. el-Hâc Süleyman’ın tamir ettirdiği evin keşfi Mahmiye-i İstanbul’da merhûm Şeyh Resmî mahallesi sâkinlerinden Ahmed Çelebi b. el-Hâc Süleyman meclis-i şer‘-i şerîfde sıdk-ı kelâm edip, mahalle-i mezbûrede merhûm-ı merkūmun evkāfından olup, iki tarafı vakf-ı mezbûr ve bir tarafı Âbid Çelebi Vakfı ve bir tarafı tarîk-i âm ile mahdûd olup icâre-i mu‘accele ve müeccele ile sâkin olduğum menzilin tuğla dolma duvarı ve tahta perdesi ve tahta döşemesi ve tarîk-i âm tarafından vâki‘ taş duvarı harâbe müşrif olmağın, bundan akdem izn-i hâkimü’ş-şer‘le tecdîd ve ta‘mîr eyledim. Hâlâ kıbel-i şer‘-i şerîfden üzerine varılıp keşf ve tahmîn ve mertebe-i tahammülü ta‘yîn olunmak taleb ederim dedikde, savb-ı şer‘-i kavîmden Mevlânâ Mahmud irsâl olunup, hâssa mi‘mârlardan Üstâd Ali b. Abdullah ve Mustafa Bey ve zeyl-i kitâbda mastûrü’l-esâmi olan bî-garaz Müslimîn ile mahall-i mezbûra varıp müşâhede ettiklerinde, fi’l-hakīka mezbûr Ahmed Çelebi’nin takrîr[i] üzre tecdîd ve ta‘mîr olunduğu mukarrer olmağın, mi‘mârân-ı mezbûrân tahmîn-i sahîh ile tahmîn eylediklerinde, şatrancî hesâbı üzre yetmiş iki zirâ‘ tuğla duvarın tecdî[di]ne bin beş yüz doksan akçe ve tahta perdenin müceddeden binâsına dört yüz akçe ve hesâb-ı mezbûr üzre elli üç zirâ‘ tahta döşemenin tecdî[di]ne bin üç yüz yirmi beş akçe ve yine hesâb-ı mezbûr üzre otuz altı zirâ‘ taş duvarın müceddeden binâsına sekiz yüz doksan akçe, cem‘an dört bin iki yüz beş akçe harc ve sarf olunmuşdur. Meblağ-ı mersûmdan noksanla husûlü müyesser değildir deyû haber verdiklerini mevlânâ-yı merkūm mahallinde tahrîr, ba‘dehû gelip mahfil-i kazâda ihbâr ve takrîr etmeğin, mâ hüve’l-vâki‘ ketb olundu. Tahrîren fî evâili Cemâziyelâhir li sene seb‘a ve ışrîn ve elf. Şuhûd[ü’l-hâl]: Halil Efendi b. Emrullah el-imâm, Mehmed b. Hasan, el-Hâc Mehmed b. el-hayyât, Mahmud b. el-hayyât, Sâlih Çelebi b. Yusuf, Mahmud b. el-Hâc Süleyman.