Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 84 Hüküm no: 62 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin Nazalta bt. İlya’daki alacağı konusunda zimmetini ibra ettiği Tüccâr tâifesinden Mehmed Beşe b. el-Hâc Ali meclis-i şer‘-i şerîfde bâ‘isetü’r-rakīm Nazalta bt. İlya nâm Yahûdiye muvâcehesinde ikrâr ve takrîr-i kelâm edip mezbûre Nazalta zimmetinde kıymet ve vezni beynimizde ma‘lûm ibrişim bahâsından dokuz yüz doksan altı guruş hakkım olup meblağ-ı mezbûru merkūme Nazalta’nın zevci gāib ani’l-meclis İsak v. Yako nâm Yahûdi merkūme Nazalta’nın emriyle kefîl bi’l-mâl olmağla hâlâ kefîl-i mezbûrun zimmetini mutâlebeden ve husûs-ı merkūma müte‘allika da‘vâdan ibrâ ve ıskāt eyledim, ba‘de’l-yevm kefîl-i mezbûr İsak’dan meblağ-ı mezbûr dokuz yüz guruşa müte‘allika da‘vâm kalmamışdır, da‘vâ dahi edersem lede’l-hükkâm-ı zevi’l-ihtirâm istimâ‘ ve ısgā olunmasın dedikde zevcem mezbûre Nazalta tasdîk ve vekîli olmağla bi’l-muvâcehe tasdîk ve zikr olunan dokuz yüz guruş vâcibü’l-edâ deyni olduğunu dahi bi’l-müşâfehe takrîr eylemeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam li-seneti’l-mezbûr. Şuhûdü’l-hâl: Mehmed Beşe b. Hüseyin, Rıdvan Beşe b. Pîrî, İbrahim b. Davud, Veli Beşe b. Nimetullah? Mehmed b. Pîrî? ve gayruhum.