Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 157 Hüküm no: 132 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Çelebi’nin Kaliçeci Zülfikâr Beşe’de olan alacağının varislerince tahsil olunması Hüccet-i havâle-i deyn Mahmiye-i İstanbul’da Kızılminâre mahallesinde sâkin iken bundan akdem vefât eden Ahmed Çelebi b. Abdullah’ın verâseti sulbiye kızları Şerîfe Ümmühani ve Şerîfe Saliha ile sulbî sagīr oğlu Şerif Mehmed’e münhasıra olup ba‘dehû mezbûre Şerife Ümmühani dahi vefât edip verâseti li-ebeveyn karındaşları mezbûrân Şerif Mehmed ve Şerife Saliha’ya münhasıra olduğu şer‘an sâbit oldukdan sonra sagīr-i mezbûr Şerif Mehmed’in ammetesi ve kıbel-i şer‘den mansûbe vasîsi olan Hadîce bt. Abdullah nâm hatun ile mezbûre Şerife Saliha taraflarından husûs-ı âti’l-beyâna vekîl olup vekâleti zâtlarını ma‘rifet-i şer‘iyye ile ârifân mahalle-i mezbûre sükkânından Mustafa Çelebi b. Mehmed ve diğer Mustafa Çelebi b. Mehmed nâm kimesneler şehâdetleri ile şer‘an sâbite olup mezbûre Şerife Saliha’nın zevci olan işbu bâ‘isü’l-kitâb Mehmed Çorbacı b. İbrahim nâm kimesne meclis-i şer‘-i şerîfde Kaliçeci Zülfikar Beşe b. Abdullah nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun dâmâdı olup bundan akdem mahmiye-i mezbûrede Hobyar mahallesinde sâkin iken vefât eden Abdi Odabaşı b. İsmail zimmetinde deyn-i şer‘îden bin yüz elli esedî guruş hakkı olup ve mezbûr Abdi Odabaşı’nın dahi mezbûr Zülfikar Beşe zimmetinde karzdan bin iki yüz guruş ve mu‘âmele-i şer‘iyye ile üzerine iltizâm olunan ribh-i şer‘îden yüz elli esedî guruş [ki] cem‘an bin yüz elli esedî guruş olmağla müteveffâ-yı mezbûr Abdi Odabaşı mezbûrân Ahmed Çelebi ve Zülfikar Beşe ile üçü bir yerde iken hayâtında cümlesinin rızâsı ile mezbûr Zülfikar Beşe üzerine havâle-i sahîha-i şer‘iyye ile havâle edip mezbûr Zülfikar Beşe dahi havâle-yi mezbûru kabûl edip mezbûr Ahmed Çelebi’nin havâle-i mezbûreden merkūm Zülfikar Beşe zimmetinde bin yüzelli esedî guruş hakkı olup kable’l-edâ vefât etmekle meblağ-ı mezbûr merkūm Zülfikar Beşe zimmetinde kalmağın suâl olunup meblağ-ı mezbûrun mezbûr Zülfikar Beşe’den alıverilmesi matlûbumdur dedikde gıbbe’s-suâl mezbûr Zülfikar Beşe kaziyye minvâl-i muharrer üzere olup havâle-i mezbûre cihetinden müteveffâ-yı mezbûr Ahmed Çelebi’ye zimmetinde vâcibü’l-edâ bin yüz elli esedî guruş deyni olduğunu tâyi‘an ikrâr u i‘tirâf etmeğin mûcebince meblağ-ı mezbûr bin yüz elli esedî guruşu müdde‘î-i mezbûr Mehmed Çorbacı’ya <> edâ ve teslîme mezbûr Zülfikar Beşe’ye tenbîh olundukdan sonra mezbûr Mehmed Çorbacı [28a] meclis-i şer‘de merkūm Zülfikar Beşe mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr bin yüz elli esedî guruşu mezbûr Zülfikar Beşe yedinden tamâmen ahz u kabz eyledim dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cemâziyelâhire li-sene ihdâ ve semânîn ve elf. Şuhûdü’l-hâl: Zahrü’l-akrân Derviş Ağa kethüdâ-yı hazret efendi, fahrü’l-eşbâh Mehmed Ağa ser-muhzırân, Mehmed Çelebi b. Abdullah, Mahmud Çelebi b. Abdullah, el-Hâc Mehmed b. Ali.