Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 158 Hüküm no: 133 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdi Odabaşı’nın varislerinin Zülfikâr Beşe aleyhindeki alacak davasından men olunmaları Efendi hazretleri imzâsıyladır. Mahmiye-i İstanbul’da Hobyar mahallesi ahâlîsinden iken bundan akdem vefât eden Abdi Odabaşı b. İsmail’in verâseti zevce-i metrûkesi Saliha bt. Ahmed ve vâlidesi Belkıs bt. Abdullah nâm hatunlar ile sulbî oğlu Hüseyin nâm sagīre münhasıra olduğu şer‘an sâbit oldukdan sonra sagīr-i mezbûrun kıbel-i şer‘den mansûb vasîsi olan Mehmed Çelebi b. İsmail nâm kimesne meclis-i şer‘-i şerîfde Kaliçeci tâifesinden bâ‘isü’l-kitâb Zülfikar Beşe b. Abdülvahab nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun mezbûr Zülfikar Beşe zimmetinde cihet-i karzdan bin esedî guruş ve mu‘âmele-i şer‘iyye ile üzerine ilzâm olunan ribh-ı şer‘îden yüz elli esedî guruş min-haysü’l-mecmû‘ bin yüz elli esedî guruş hakkı olup kable’l-ahz ve’l-istîfâ vefât etmekle zimmetinde kalmağın suâl olunup meblağ-ı mezbûrdan sagīr-i mezbûrun hissesi olan sekiz yüz on dört buçuk esedî guruşun mezbûr Zülfikar Beşe’den alıverilmesi matlûbumdur dedikde gıbbe’s-suâl mezbûr Zülfikar Beşe cevâbında müteveffâ-yı mezbûr Abdi Odabaşı’nın kaynatası olup bundan akdem vefât eden Ahmed Çelebi’ye bin yüz elli esedî guruş deyni olmağla mezbûr Abdi Oda[başı] târîh-i kitâbdan on ay mukaddem hayâtlarında üçümüz bir yerde iken dâyini mezbûr Ahmed Çelebi’yi rızâmız ile deyn-i mezbûrum için benim üzerime havâle-i sahîha-i şer‘iyye ile havâle edip ben dahi havâle-i mezbûreyi kabûl edip deyn-i mezbûrum mezbûr Ahmed Çelebi’ye müntakil olmağla mezbûr Abdi Odabaşı’ya ciheteyn-i mezbûreteynden zimmetim berî olmuş idi deyü def‘ ile mukābele edicek gıbbe’s-suâl ve’l-inkâr mezbûr Zülfikar Beşe’den def‘-i mezbûrunu mübeyyine beyyine taleb olundukda mahmiye-i mezbûrede Süleyman Ağa mahallesi sükkânından Âişe b. Abdülkerim ve Musa b. Mehmed ve mahrûse-i Galata muzâfâtından kasaba-i Tophane’de Sakābaşı mahallesi ahâlîsinden olup Kaliçeci tâifesinden olan Solak Mahmud Bey b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Abdi Odabaşı târîh-i kitâbdan on altı ay mukaddem hayâtında dâyini olup kaynatası olan mezbûr Ahmed Çelebi’yi mezbûr Zülfikar Beşe zimmetinde olan bin yüzelli esedî guruş hakkı için üçü bir yerde iken rızâları ile mezbûr Zülfikar Beşe üzerine havâle-i sahîha-i şer‘iyye ile bizim huzûrumuzda havâle edip mezbûr Zülfikar Beşe dahi havâle-yi mezbûreyi kabûl edip deyn-i mezbûr mezbûr Ahmed Çelebi’ye müntakil olmuş idi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i mübeyyen üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: el-Hâc Halil b. el-Hâc Mehmed, Mehmed Çavuş b. Osman, el-Hâc Yusuf b. Oruç, Mehmed b. Ramazan, Osman Beşe el-mübâşir.