Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 159 Hüküm no: 134 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Veli’nin boşandığı kocası Mehmed Çelebi’de olan mehir ve sâir alacaklarını tahsil etmesi Mahmiye-i İstanbul hısnı ebvâbından Ayakapısı hâricinde Seferikoz mahallesi sâkinelerinden Saliha bt. Veli nâm hatun meclis-i şer‘-i şerîfde zevc-i dâhilün-bihâsı bâ‘isü hâze’l-kitâb Mehmed Çelebi b. Mustafa nâm kimesne tarafından husûs-ı âti’l-beyâna vekîl olup Mustafa b. Abdullah ve Osman b. Mustafa nâm kimesneler şehâdetleri ile şer‘an vekâleti sâbite olan Hüseyin Çelebi b. Hasan nâm kimesne mahzarında ikrâr ve takrîr-i kelâm edip zevcim müvekkil-i mezbûr Mehmed Çelebi beni talâk-ı selâse ile tatlîk etmeğin zimmetinde mütekarrir ve ma‘kūdün-aleyh olan bin dört yüz akçe mehr-i müeccelim ile nafaka-i iddet-i ma‘lûmem ve me’ûnet-i süknâm için ta‘yîn olunan üç yüz akçe ki cem‘an bin yedi yüz akçeyi vekîl-i mezbûr Hüseyin Çelebi yedinden tamâmen ahz u kabz edip zevciyete müte‘allıka âmme-i de‘âvî ve mutâlebâtdan [28b] ben müvekkil-i mezbûru ibrâ-i âmm-ı kâtı‘u’n-nizâ‘ ile ibrâ ve iskāt eyleyip vekîl-i mezbûr dahi vekâleti hasebiyle beni ibrâ-i âmm-ı kâtı‘u’n-nizâ‘ ile ibrâ eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cumâdelâhire li-sene ihdâ ve semânîn ve elf. Ahmed Ağa b. Abdullah, Şükrullah b. Mustafa, Mustafa b. el-Hâc Ahmed, İbrahim Çelebi b. Ahmed.