İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 293 Hüküm no: 408 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraylı Halime bt. Abdullah’ın, evini Hatice Sultan’a sattığı Mahmiye-i İstanbul mahallâtından İskender Ağa mahallesi sâkinelerinden Saraylı Halîme Hâtun bt. Abdullah mahfil-i kazâda fahrü’l-muhadderâti’l-mükerremât tâcü’l-mestûrâti’l-mu‘azzamât safiyyetü’z-zât zekiyyetü’s-saffât el-manzûre bi inâyeti’l-meliki’r-Rahmân Hatice Sultan -dâmet ismetuhâ- hazretlerinin cânib-i âlîlerinden ikrâr-ı âti’z-zikri tasdîka vekîl olup, Mehmed Halife b. el-Hâc Veli el-imâm ve Mehmed b. Ali şehâdetleri ile hasm-ı câhid mahzarında vekâleti sâbite olan gılmân-ı acemiyândan Hızır Beşe b. Yusuf nâm Baltacı muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î edip, mahalle-i merkūmede vâki‘ bir tarafdan Mehmed Çelebi b. Ali ve Keyvan Bey b. Abdullah el-Bevvâbü’s-sultânî mülklerine ve bir tarafdan Raziye ve Ma‘rife Hâtun mülklerine ve bir tarafdan Ramazan b. Abdullah ve Mehmed b. Abdullah mülklerine ve bir tarafdan tarîk-i âmma müntehî olup, bir bâb ulvî ve bir bâb süflî avluyu ve su kuyusunu ve kenîfi ve zât eşcâr-ı müsmire ve gayr-i müsmire muhavvatayı müştemil ve hâvî olan mülk menzili, âmme-i tevâbi‘ ve levâhıkı ve kâffe-i menâfi‘ ve merâfıkı ile müvekkile-i mûmâ-ileyhâ -dâmet ismetuhâ- bey‘-i bâtt-ı sahîh-i şer‘î ile otuz bin nakd-i râyic fi’l-vakt akçeye bey‘ edip, kabz-ı semen ve teslîm-i mebî‘ etdim. Ba‘de’l-yevm menzil müvekkile-i müşârun-ileyhânın mülk-i müşterâlarıdır dedikde, mukırre-i merkūmeyi ikrâr-ı meşrûhunda mezbûr Hızır Beşe dahi vekâlet-i mahkiyesi hasebiyle vicâhen tasdîk ve şifâhen tahkīk etmeğin, mâ vaka‘a ketb ü tahrîr olundu. Tahrîren fi’l-yevmi’s-sânî aşer min Cemâziyelâhir li sene seb‘a ve ışrîn ve elf. Şuhûdü’l-hâl: Ahmed b. Mehmed el-imâm, Ramazan b. Mustafa, Hüseyin b. Hamza, Mehmed b. Ahmed, Mehmed b. Ali, İbrahim b. Receb, Hacı Mehmed b. İsmail, Halil b. Hacı İbrahim ve gayruhüm.