İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 293 Hüküm no: 409 Orijinal metin no: [46b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Bey b. Abdullah’ın, Gülbeşe Hâtun Vakfı’ndan kiraladığı evin kirasının tespiti Mahmiye-i İstanbul’da Kâtib Şemseddin mahallesi sâkinlerinden fahrü’l-eşbâh Yusuf Bey b. Abdullah nâm bevvâb-ı sultânî meclis-i şer‘de takrîr-i kelâm edip, mahalle-i mezbûrede vâki‘ merhûme Gülbeşe Hâtun vakfından olup, inde’l-ahâlî ma‘lûmü’l-hudûd olan menzil-i merkūm murûr-ı eyyâm ile ve kürûr-ı a‘vâm ile harâbe müşrif olup, müceddeden binâsına cânib-i vakıfdan müsâ‘ade olmamağın, vakf-ı mezbûr mütevellîsi olan Rıdvan b. Abdullah menzil-i mezbûru bana icâre-i mu‘accele-i ma‘lûme ve yevmî iki akçe ücret-i müeccele ile îcâr edip ve kendi mâlım ile ihdâs ettiğim binâ cânib-i vakıfdan icâre-i mu‘acceleye mahsûb olmak üzre izin verip, ben dahi ta‘mîr ve meremmet etmek istediğimde, ba‘zı kimesneler bana garazen menzil-i mezbûrun yevmî dört akçe ücrete tahammülü vardır, ecr-i mislinden dûnla istîcâr ettin biz yevmî dörder akçeye kabûl ederiz demeğin, mütevellî-i mezbûr tasarrufuma mâni‘ olup, kıbel-i şer‘den ehl-i hibre ile üzerine varılıp menzil-i mezbûrun yevmî ne mikdâr akçe ücrete tahammülü vardır, ba‘de’l-yevm ketb ve terkīm olunup minvâl-i muharrer üzre binâya izn-i şer‘î verilmek taleb ederim dedikde, savb-ı şer‘den Mevlânâ Şaban Efendi ve Hâssa mi‘mârlardan Üstâd ( ) b. Abdullah ve Üstâd Mustafa b. Abdullah irsâl olunup, zeyl-i kitâbda mastûretü’l-esâmi olan Müslimîn ile menzil-i mezbûra varıp, mütevellî-i mezbûr mahzarında mi‘mârân-ı merkūmân, işbu menzilin yevmî üç buçuk akçeye tahammülü vardır, hâlâ ziyâdeye îcâr olunsa ba‘de zamân kimesne rağbet etmemekle hâlî kalıp vakfa gadr olmak lâzım gelir, ancak ecr-i misli yevmî üçer akçedir deyû mi‘mârân-ı mersûmân sâir ehl-i vukūf-ı Müslimîn ittifâkıyla haber verdiklerinde, müste’cir-i mezbûr dahi kabûl etmeğin, vâki‘ hâli mevlânâ-yı mezbûr mahallinde tahrîr ve mahfil-i kazâda ihbâr ve takrîr etmeğin, minvâl-i mastûr üzre binâya izn-i şer‘î verilip, mâ vaka‘a ketb olundu. Tahrîren fi’l-yevmi’s-sânî aşer min Cemâziyelâhir li sene seb‘a ve ışrîn ve elf. Şuhûdü’l-hâl: Abdi Çavuş b. Abdullah, Hüseyin Ağa [b.] Abdullah, İbrahim Halife b. Nasûh, Abdülbâkī Çelebi, Mehmed Beşe, Mehmed Efendi b. Şaban el-imâm, Rüstem b. Abdullah.