İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 294 Hüküm no: 410 Orijinal metin no: [46b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın, Ahmed b. Abdülvehhâb’daki emânet para davasının anlaşma ile sonuçlandığı El-emru kemâ fîh Harrerehû el-fakīru ileyh subhânehû İbrahim b. Süleyman el-müvellâ hilâfetühû Kostantıniyye el-mahmiyye. ufiye anhümâ. Vilâyet-i Anadolu’da Kütahya sancağı müzâfâtından Gönen(?) nâm karyede sâkin iken bundan akdem kal‘a-i Kars’da vefât eden, Altmışıncı Ağa Bölüğünde[n] Haydar b. Abdullah nâm râcilin ibn-i hâletesi ve bi’l-inhisâr vârisi Hasan b. Abdullah mahfil-i kazâda hâmilü’l-kitâb Ahmed b. Abdülvehhâb mahzarında ikrâr-ı tâm ve takrîr-i kelâm edip, müteveffâ-yı mezbûr hâl-i hayâtında mezbûr Ahmed Beşe’ye alâ tarîki’l-emânet on iki bin akçe teslîm edip, ba‘de vefâtihî verâset-i mahkiyemiz hasebiyle meblağ-ı mezbûr bana intikāl edip taleb etmemle, beynimizde münâza‘ât-ı kesîre vâki‘ olmuş idi. El-hâletü hâzihî beynimize muslihûn tavassut edip, meblağ-ı mezbûru altı bin nakd-i râyic fi’l-vakt akçeye ıslâh edip, ben dahi sulh-ı mezbûru kabûl ve bedel-i sulh olan meblağ-ı mezbûru merkūm Ahmed Beşe yedinden bi’t-tamâm alıp kabz edip, husûs-ı mezkûra müte‘allik da‘vâdan zimmetini ibrâ ve ıskāt etdim, ba‘de’l-yevm bi’z-zât veya bi’l-vâsıta da‘vâ dahi sudûr ederse mesmû‘a olmaya dedikde, mâ hüve’l-vâki‘ gıbbe’t-tasdîk kayd şüd. Hurrire fi’l-yevmi’s-sâbi‘ min Cemâziyelâhir sene [10] 27. Şuhûdü’l-hâl: Ahmed Beşe b. er-râcil, el-Hâc Hasan [b.] Abdullah, Hızır b. Abdullah, Mustafa b. Abdullah, Cafer b. Abdullah er-râcil.