İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 295 Hüküm no: 412 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan Ağa Vakfı’na ait bakkal dükkânını kiralayan Makri v. Pilov’a temessük verilmesi İşbu râfi‘ü’l-kitâb Makri v. Pilov nâm zimmî meclis-i şer‘-i şerîfe gelip takrîr-i kelâm edip, Sinan Ağa nâm sâhibü’l-hayrın vakfı olup mahmiye-i İstanbul’da el-Hâc Ferhad mahallesinde vâki‘ lede’l-cîrân ma‘lûmü’l-hudûd olan bir bâb bakkāl dükkânı cânib-i vakıfdan îcâr olunmak lâzım gelmeğin, mütevellîsi olan Hasan b. Ahmed bin yirmi Rebî‘ilâhiri’nin yirmi ikisinde vakf için yedimden üç yüz akçe icâre-i mu‘accele alıp kabz edip, beher ay yirmi beşer akçe icâre-i müeccele ile bana îcâr eyleyip, ben dahi vech-i mübeyyen üzre istîcâr ve kabûl eylediğimden sonra lede’l-ihtiyâc meremmetini dahi taht-ı icâremde oldukça kendi mâlımdan etmeğe râzı olduğuma binâen zabt u tasarrufu için yedime tezkire vermiş idi. El-hâletü hâzihî tezkire mazmûnunca savb-ı şer‘den dahi temessük taleb ederim deyû mütevellî-i mezbûr nâmına hatt u hâtemini müştemile ve târih ile müverraha mazmûnu takrîrine mutâbık mütevellî tezkiresi ibrâz eylemeğin, tezkiresi mûcebi üzre bu sahîfe talebiyle ketb olunup, cânib-i vakfa icâre-i müeccele-i mu‘ayyenesini edâ eyleyip ve meremmâtını mâlından edâ eyledikce zabt u tasarrufuna kimesne mâni‘ olmamak savb-ı şer‘-i mutahharadan yedine def‘ olundu ki, lede’l-ihtiyâc ibrâz ve ihticâc ve def‘-i hasm-ı licâc ede. Tahrîren fi’l-yevmi’l-hâmis aşer min Cemâziyelâhir li sene seb‘a ve ışrîn ve elf. Şuhûdü’l-hâl: Üstâd Mehmed b. ( ), Bayram b. Abdullah, Mehmed b. Pervâne, Üstâd Hamza, Muharrem [b.] Himmet, İbrahim b. Hamza ve gayruhüm.