İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 306 Hüküm no: 431 Orijinal metin no: [49a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Yahya Efendi b. Mahmud’un, satın aldığı çiftlik hissesini Mehmed b. Yakub’a iade ettiği Umdetü’l-müderrisîn kıdvetü’l-muhakkikīn Yahya Efendi b. Mahmud meclis-i şer‘-i kavîmde vilâyet-i Anadolu’da Ünye kazâsına tâbi‘ Eşrefli nâm karye sâkinlerinden hâmil-i hâze’l-kitâb Mehmed b. Yakub nâm kimesne muvâcehesinde ikrâr ve takrîr-i kelâm edip, bundan akdem mezbûr Mehmed on beş yıl gāib olmağla, li eb ve üm karındaşları olan Mustafa ve Yakub ile iştirâk-i seviy üzre taht-ı tasarruflarında olup lede’l-ahâlî ma‘lûmü’l-hudûd olan dokuz kıt‘a tarlalardan sülüs hissesi bi hasebi’l-kānûn tapuya müstehak olmağla, hisse-i merkūmeyi sipâhisinden tapu ile ben almışdım, el-hâletü hâzihî mezbûr Mehmed gelip zikr olunan hisseyi benden taleb ettikde, muslihûn tavassutu ile Köselin altı dimekle ma‘rûf olan çiftlik ki, bir tarafı Seydî havlusu ve bir tarafı hendek toprağı ve bir tarafı dere ve bir tarafı Seniceli sınırıyla mahdûd olup, tahmînen keyl-i İstanbulî ile sekiz keyl tohumluk zâdı bana vermek üzerine mâbeynimizi tevfîk eylediklerinde, ben dahi zikr olunan sekiz keyl tohumluk zâdı kabûl edip, hisse-i merkūmeyi mezbûr Mehmed’e teslîm etdim, ba‘de’l-yevm mârrü’z-zikr hisseye müte‘allika benden asâleten veya vekîlimden vekâleten da‘vâ sâdıre olursa lede’l-huddâm-ı [hükkâm-ı] zevi’l-ihtirâm mesmû‘a olmaya dedikde, mukırr-ı mûmâ-ileyh Yahya Efendi’yi ikrâr-ı meşrûhunda el-mukarru lehü’l-merkūm Mehmed vicâhen tasdîk ve şifâhen tahkīk ettikden sonra Davud Efendi b. Yusuf el-kârizî müşârun-ileyh Yahya Efendi’ye bedel-i mîrîlere mârrü’z-zikr zâdının derkine kefîl oldum dedikde, mâ hüve’l-vâki‘ gıbbe’t-taleb ve’l-kabûl ketb ve yed-i tâlibe vaz‘ olundu. Tahrîren fî evâhiri Cemâziyelâhir li sene seb‘a ve ışrîn ve elf. Şuhûdü’l-hâl: Mustafa Efendi b. Yusuf el-kadı, Mustafa Efendi b. Receb el-kadı, Musa Efendi b. Resûl, Muslihiddin Efendi b. Mehmed el-müderris, Ali Efendi b. Şaban, Mehmed Efendi b. Mustafa, Hızır b. Hüseyin el-kadı, Şucâ‘ Efendi el-kadı, Abdi Efendi el-kadı, Mehmed Beşe b. Musli ve gayruhüm.