İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 306 Hüküm no: 432 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın sattığı kuşağın parasını ödemeyen Ayşe Hâtun bt. Yusuf’tan geri aldığı Mahmiye-i İstanbul’da Lanka kurbunda vâki‘ Koğacı Dede mahallesi sâkinlerinden Mustafa b. Abdullah nâm kimesne meclis-i şer‘-i kavîmde mahalle-i mezbûre sâkinelerinden Ayşe Hâtun bt. Yusuf tarafından husûs-ı âti’l-beyâna vekîl olup, mezbûre Ayşe’yi ma‘rifet-i şer‘î ile ârifeyn olan Hızır b. Mehmed ve Halil b. İbrahim nâm kimesneler şehâdetleriyle hasm-ı mu‘teber mahzarında vekâleti sâbite olan zevci Mehmed b. Abdullah nâm kimesne muvâcehesinde ikrâr ve takrîr-i kelâm edip, bundan akdem bir murassa‘ kuşağımı mezbûre Ayşe’ye on üç bin akçeye bey‘ ve teslîm edip, ol dahi iştirâ ve tesellüm ettikden sonra semeni olan meblağ-ı mesfûr on üç bin akçeyi merkūme Hâtun’dan taleb ettiğimde, edâdan imtinâ‘ etmekle izn-i hâkim ile merkūme Hâtun Zindân-ı Sultânî’de habs olunmuş idi. El-hâletü hâzihî bey‘-i mezbûru ikāle ve fesh edip terâzi olmaya rücû‘ edip, merkūme Ayşe Hâtun zikr olunan kuşağı bana teslîm edip, ben dahi alıp kabz ettiğimden sonra mezbûre Ayşe Hâtun’un dahi benim yedimde vedî‘at olan yirmi bir miskāl altın bileziğini merkūme Hâtuna teslîm etdim dedikde, mukırr-ı mezbûre [mezbûr] Mustafa’yı ikrâr-ı meşrûhunda vekîl-i mezbûr Mehmed vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb olundu. Tahrîren fî evâsıtı Cemâziyelâhir li sene seb‘a ve ışrîn ve elf. Şuhûdü’l-hâl: Mahmud b. Bâli, Halil b. İbrahim, Musli b. Cafer, Ali b. Abdullah, Kadri b. Mustafa ve gayruhüm.