İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 317 Hüküm no: 452 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Süleyman’ın tarlalarının tasarruf hakkını devretmesi Vilâyet-i Anadolu’da Bucura kazâsına tâbi‘ Süleyman Hacılar nâm karye sâkinlerinden Hasan Efendi b. Süleyman el-mülâzım meclis-i şer‘-i şerîfde, kazâ-i mezbûra tâbi‘ Demirciler karye sükkânından ashâb-ı hâze’l-kitâb Osman b. Fazlullah ve Mustafa b. Kuluhan ve Veli b. el-Hâc Yusuf nâm kimesneler muvâcehelerinde ikrâr ve i‘tirâf edip, zikr olunan karye-i Demirciler sınırında vâki‘ lede’l-ahâlî ma‘lûmü’l-hudûd olup, bundan akdem bilâ evlâd-ı zükûr fevt olan Mahmud b. Mustafa ve Resûl b. Şaban’ın mahlûllerinden aldığım Çiftlik demekle ma‘rûf olan tarlaların hakk-ı tasarruflarını, sâhib-i arz ma‘rifetiyle merkūmûn Osman ve Mustafa ve Veli’ye tefvîz edip, ânlar dahi ber vech-i iştirâk-i seviy tefevvüz ve kabûl eylediklerinden sonra, mukābele-i tefvîzde mezbûrûn Osman ve Mustafa ve Veli yedlerinden üç yüz nakd-i râyic fi’l-vakt akçelerin ahz u kabz eyledim, ba‘de’l-yevm sâir tarlaları gibi mutasarrıf olsunlar dedikde, mukırr-ı mezbûr Hasan Efendi vech-i meşrûh üzre sâdır olan ikrârında el-mukarrun lehümü’l-merkūmûn Osman ve Mustafa ve Veli vicâhen ve şifâhen tahkīk edicek, mâ hüve’l-vâki‘ gıbbe’t-taleb ketb ve tâlibler yedlerine vaz‘ olundu. Tahrîren fî evâhiri Cemâziyelâhir li sene seb‘a ve ışrîn ve elf. Şuhûdü’l-hâl: Ahmed Efendi b. Hasan el-mülâzım, Müstecâb Efendi b. Hüseyin el-kadı, İlyas Efendi b. İshak el-müsta‘id, Veli Efendi b. Mehmed el-müsta‘id, Maden Efendi b. Hamza el-müsta‘id.