İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 317 Hüküm no: 453 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resûl b. İshak’ın, Subaşı Murad b. İbrahim hakkındaki gasp davasında anlaşma sağlandığı Vilâyet-i Anadolu’da Kastamonu sancağında Boyabad kazâsına tâbi‘ Kalasa nâm karye sükkânından Resûl b. İshak nâm kimesne meclis-i şer‘de Murad b. İbrahim mahzarında ikrâr ve i‘tirâf edip, bundan akdem mezbûr Murad vilâyetimizde subaşı iken bilâ vech-i şer‘î evim basıp üç bin beş yüz akçemi almış idi deyû hâlâ taleb ettiğimde, vermede ta‘allül ve inkâr edip, beynimizde münâza‘ât vâkı‘a olmuş idi. El-hâletü hâzihî beynimize muslihûn tavassut edip beni dört yüz akçeye sulh edip, ben dahi sulh-ı mezbûru kabûl ve bedel-i sulh olan meblağ-ı mezkûru yedinden bi’t-tamâm alıp kabz edip, zimmetini husûs-ı mezbûra müte‘allik da‘vâdan ibrâ ve ıskāt eyledim dedikden sonra mezbûr Murad dahi meclis-i şer‘de vech-i muharrer üzre merkūm Resûl’ün zimmetini husûs-ı mezbûra müte‘allika olan de‘âvîden ibrâ ve ıskāt eyledim dedikde, gıbbe’l-kabûl ve’t-tasdîk min tarafeyn, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min Cemâziyelâhir sene 1027. Şuhûdü’l-hâl: Mehmed Efendi b. Yusuf, Veli Efendi b. Ramazan, Mehmed Efendi b. İbrahim, Hüseyin Çavuş b. Abdullah.