Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 162 Hüküm no: 138 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un eşi Hüseyin Çelebi’den muhâlaa yoluyla boşanması ve birbirlerinin zimmetlerini ibra etmeleri Mahmiye-i İstanbul’da Yenibahçe kurbünde Karabaş mahallesinde sâkine Râbia bt. el-Hâc Mustafa nâm hatun tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan mahalle-i mezbûre sükkânından Mehmed Ağa b. İbrahim ve Mehmed Çelebi b. Hasan Efendi b. Mustafa nâm kimesneler li-ecli’ş-şehâdetler ile şer‘an vekâleti sâbite olan Hasan Efendi b. Mustafa nâm kimesne şer‘-i hatîr-ı lâzımü’t-tevkīrde müvekkile-i mezbûrenin zevci işbu bâ‘isü’l-kitâb Hüseyin Çelebi b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Râbia Hatun zevci merkūm Hüseyin Çelebi zimmetinde mütekarrir ve ma‘kūdün-aleyh olan on bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzere mezbûr Hüseyin Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allıka da‘vâdan ve zevciyet beynlerinde kāime iken mezbûr Hüseyin Çelebi zimmetinde cihet-i karzdan iki yüz elli esedî guruş hakkım vardır deyü mezbûr Hüseyin Çelebi’den da‘vâ eylemiş idi. Hâlâ ol da‘vâdan dahi mezbûr Hüseyin Çelebi’nin zimmetini ol dahi müvekkile-i mezbûrenin zimmetini ibrâ-i âmm-ı kâtı‘u’n-nizâ‘la ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevm min-gurreti Recebi’l-ferd li-sene ihdâ ve semânîn ve elf. Şuhûdü’l-hâl: Hasan Efendi b. Dede Hızır, Mustafa Çelebi b. Hasan, Mustafa b. Mehmed, es-Seyyid Mustafa Çelebi b. es-Seyyid Mehmed, el-Hâc Mehmed b. İbrahim, el-Hâc Mehmed b. Lutfullah, Hasan Efendi b. Hüsameddin, Mustafa Çelebi.