Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 162 Hüküm no: 139 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime Hatun’un azatlı cariyesi Tevekkül’e bazı eşyalarını hibe etmesi Mahmiye-i İstanbul’da Sofular mahallesi sâkinelerinden fahrü’l-muhadderât Saime bt. Pir Ali nâm hatun meclis-i şer‘-i şerîfde musiyesi? olup mu‘sire olan işbu râfi‘atü’l-kitâb Tevekkül bt. Abdülvahab nâm sagīre mahzarında ikrâr ve takrîr-i kelâm edip eşyâ-i memlûkemden iki müsta‘mel çatma döşek, dört müsta‘mel yorgan, dört çift Bursa yasdığı ve bir orta keçesi ve iki cedîd yan keçesi ve iki minder ve dört sahan ve iki tencere ve bir leğen ve bir ibrik ve on beş miskāl endîşe altın bilezik ve dört ayaklı bir çift altın küpe ve bir sîm raht kuşak ve inciden masnû‘ on yedi dal tepelik ve bir saçlık ve bir mücevher sorguç ve bir çift kefkir ve bir baklava tepsisi ve bir nühâs sini ve bir nühâs tas ve bir tabl kotuş? ve bir mükemmel hamam rahtı ve kırk dört zirâ‘ Üskübî keten bezi ve Üskübüden otuz donluk keten bezi ve üç döşek çârşebi ve bir münakkaş dülbend örtüsü ve üç münakkaş boğça ve bir cedîd münakkaş sofra ve iki peşkirimi ve nakid yüz esedî guruşumu mu‘taka-i mezbûre Tevekkül’e hîbe-i şurût-ı müfsideden âriye hîbe-i sahîha-i şer‘iyye ile hîbe ve temlîk ve tesellüm edip ol dahi ittihâb ve temellük ve tesellüm eyledi ba‘de’l-yevm eşyâ-i mezkûre ile meblağ-ı mezbûr merkūme Tevekkele’nin mülk-i mevhûbudur benim aslâ alâkam yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-mürecceb li-sene ihdâ ve semânîn ve elf. Şuhûdü’l-hâl: Mustafa Efendi b. Musli, Muharrem Efendi b. Himmet, Ramazan Çelebi b. Mustafa, Mehmed Çelebi b. Nurullah, Yusuf Beşe b. Abdullah.