Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 163 Hüküm no: 140 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi’nin Eskişehir’de bulunan vakıf arsa ve değirmenini Mehmed Ağa’ya satması Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden Mevlânâ Müderriszâde Abdurrahman Efendi irsâl olunup ol dahi fahrü’l-emâsil ve’l-akrân İsmail Efendi b. el-merkūm Ruznâmeci Hüseyin Efendi’nin mahmiye-i İstanbul’da Aya[so]fya-i kebîr kurbünde Üskübî mahallesinde vâki‘ menziline varıp zeyl-i kitâbda muharrerü’l-esâmî olan Müslimîn mahzarlarında akd-i meclis-i şer‘-i mübîn eyledikde mezbûr İsmail Efendi meclis-i ma‘kūd-ı mezbûrda bâ‘isü hâze’l-kitâb umdetü’l-akrân Mustafa Bey b. el-merkūm Mehmed Paşa tarafından husûs-ı âti’l-beyâna vekîl olduğu Kaytas Bey b. Abdullah ve el-Hâc Siyavuş b. Abdullah nâm kimesneler şehâdetleri ile şer‘an vekâleti sâbite olan Mehmed Ağa b. Mehmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup vilâyet-i Anadolu’da Eskişehir kasabasına tâbi‘ Hass-ı Karaöyük? nâm karye kurbünde vâki‘ arsasının merhûm Kasım Paşa Vakfı’na senede bin akçe mukāta‘a-i kadîmesi olup Kütahya Suyu demekle ma‘rûf nehir üzerinde dâir beyne’l-ahâlî ve’l-cîrân ma‘lûmü’l-hudûd on göz değirmenimi cemî‘ hukūk ve merâfıkı ile içinde el-ân mevcûde olan beynimizde ma‘lûm âlât-ı lâzımesini iki bin dört yüz elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile vekîl-i mezbûr Mehmed Ağa’ya bey‘ edip ol dahi müvekkili için iştirâ ve kabûl etdiğinden sonra semeni olan meblağ-ı mezbûr iki bin dört yüz elli esedî guruşu vekîl-i mezbûr Mehmed Ağa yedinden bi’t-tamâm ahz u kabz edip mebî‘-i mezbûru mahallinde kabza müvekkil-i mûmâ-ileyhi taslît eyledim. Ba‘de’l-yevm mebî‘-i mezbûr müvekkil-i mûmâ-ileyh Mustafa Bey’in mülk-i müşterâsıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîk husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Receb Çelebi b. Mahmud ve İbrahim b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Hacı Siyavuş b. Abdullah, Baba Yusuf b. Abdullah, Süleyman Çelebi b. Mehmed Halîfe, Abdulkadir b. Yusuf, Mehmed Efendi b. Hamza, Hacı Ali b. Hızır nâsır-ı sîmkeş, Ahmed Efendi b. Hacı Ali, Abdullah Efendi b. Mustafa et-Tabib.