Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 164 Hüküm no: 141 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem’in Kiragos aleyhindeki alacak iddiasının zamanaşımı nedeniyle reddedilmesi Hüccet, on beş sene mürûr eden da‘vâdan men‘ Fi’l-asl mahmiye-i İstanbul’da Nişancı Paşa mahallesi sâkinelerinden olup târîh-i kitâbdan on beş sene evvel mahalle-i mezbûreden kalkıp vilâyet-i Rumili’nde Kirman kasabasında tavattun eyledikden sonra hâlike olan Hanım bt. Haçok nâm Ermeniyenin sadriye kebîre kızı ve hasren vârisesi olan Meryem bt. ( ) nâm Ermeniye meclis-i şer‘-i şerîf-i enverde mahalle-i mezbûre ahâlîsinden işbu râfi‘ü’l-vesîka [Ki]ragos v. Ligon nâm Ermeni muvâcehesinde üzerine da‘vâ ve takrîr-i kelâm edip mûrisem hâlike-i mezbûre târîh-i kitâbdan yirmi sene evvel mahalle-i mezbûrede sâkin iken seksen yedi guruşu mezbûr Kiragos ikrâz ve teslîm, mezbûr Kiragos dahi iktirâz ve kabz eylediğinden sonra mezbûre Hanım hâlike olmağla suâl olunup alıverilmesi murâdımdır dedikde gıbbe’s-suâl mezbûr Kiragos cevâbında hâlike-i mezbûreye deynim olmadığından mâ‘adâ hâlike-i mezbûre hayâtında mahalle-i mezbûrede benim ile on beş sene ma‘an sâkine olup benden bir nesne da‘vâ etmeyip bilâ-özr sükût etmişdir dedikde gıbbe’l-istintâk mezbûre Meryem hâlike-i mezbûrenin vech-i muharrer üzere on beş sene terk olunan da‘vâlar istimâ‘dan hükkâm-ı şer‘ memnû‘ olmağla müdde‘iye-i mezbûrenin da‘vâ-yı mezbûresi istimâ‘ için emri dahi olmamağın da‘vâ-yı mezbûresi istimâ‘ olunmayıp mâ-hüve’l-vâki‘ bi’t-taleb ketb olundu. Fi’l-yevmi’l-hâdî min-Cumâdelâhir li-sene ihdâ ve semânîn ve elf. Şuhûdü’l-hâl: Mehmed b. Yusuf, İsmail Çelebi b. Sinan, Ahmed b. Abdullah, İbrahim b. Ahmed.