Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 165 Hüküm no: 142 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa Bostancıları Başeskisi Hasan Ağa’nın Rus asıllı kölesi Abdullah’ı azat etmesi Mahmiye-i İstanbul’da Hocapaşa kurbünde sâkin olup hâssa bostancılarının Başeskisi olan Hasan Ağa b. Hüseyin tarafından husûs-ı âti’l-beyâna vekîl olup vekâleti Ali Bey b. Mehmed ve Mahmud Bey b. Mehmed şehâdetleri ile şer‘an sâbite olan Mustafa Ağa b. Zülfikar nâm kimesne meclis-i şer‘-i şerîf-i enverde işbu orta boylu açık kaşlı sarı elâ gözlü Rusiyyü’l-asl Abdullah b. Abdullah mahzarında bi’l-vekâle ikrâr ve i‘tirâf edip ıtk-ı rakabât a‘zam-ı kurebât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘takın ıtkı mukābelesinde mu‘tıkın cemî‘ uzvunu nârdan âzâd olduğu nâtık [30a] hadîs-i şerîfin mefhûmuna muttali‘ olmağın mevsûf-ı mezbûru hasbeten lillâhi te‘âlâ ve haseneten li-rûhi’l-mu‘allâ tahrîr ve i‘tâk ve zümre-i ahrâr-ı asliyyîne idrâc ve ilhâk eyledi. Ba‘de’l-yevm mevsûf-ı mezbûr sâir ahrâr-ı asliyyîn gibi hür olsun, üzerinde mevâlî için şer‘an sâbit olan velâ-yı şer‘îden gayrı hak ve alâkası kalmamışdır dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Recebi’l-ferd li-sene ihdâ ve semânîn ve elf. Şuhûdü’l-hâl: Bermer Kara Pir, Çalık İbrahim Ağa b. ( ), Ebubekir Bey b. Ivaz, Mehmed Beşe b. ( ), İbrahim Çelebi b. Ahmed.