İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 334 Hüküm no: 485 Orijinal metin no: [55a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hürriyetini elde etmiş olan Çerkez Sâliha köle diye satanların birbirleriyle hesaplaşmaları Mahmiye-i İstanbul’da esirci tâ’ifesinden Hızır Beşe b. Abdullah nâm râcil meclis-i şer‘-i şerîfde, sâhibetü’l-kitâb Raziye bt. Hamza nâm hâtun tarafından tasdîk-i âti’l-beyâna vekîl olup, merkūmeyi ma‘rifet-i şer‘iyye ile ârifeyn olan Mahmud b. Abdullah ve Hüseyin Çelebi b. Hüsrev şehâdetleri ile hasm-ı câhid mahzarında şer‘an vekâleti sâbite olan zevci Kurd Beşe b. Abdullah muvâcehesinde ikrâr ve takrîr-i kelâm edip, bundan akdem Mustafa Beşe b. Abdullah nâm râcilden yirmi dört bin nakd-i fıddî-i râyic fi’l-vakt akçeye iştirâ ve kabz ettiğim Çerkeziyyetü’l-asl Sâliha nâm câriye benim yedimde iken, bundan esbak mahmiye-i mezbûrede kadı olan Bahşî Efendi hazretleri huzûrunda Sabiha nâm hâtunun mülkü olduğu hâlde, merkūme Sabiha’nın i‘tâk ettiğini şer‘le isbât edip ıtkına hükm olunup sebîli tahliyye olundukdan sonra, ben dahi bâyi‘im olan mezbûr Mustafa Beşe’ye rücû‘ bi’s-semen edip ve merkūm Mustafa Beşe dahi bâyi‘ası olan Fâtıma nâm hâtuna ve mezbûre Fâtıma dahi bâyi‘ası olan merkūme Raziye’ye rücû‘ bi’s-semen etmek lâzım geldikde, dördümüz muvâcehesinde merkūm Mustafa Beşe semen-i mezbûru bana mezbûre Fâtıma’dan havâle edip ve merkūme Fâtıma dahi mezbûre Raziye’den havâle edip, ben dahi kabûl etmiş idim. El-hâletü hâzihî semen-i merkūm yirmi dört bin akçeyi merkūme Raziye’nin vekîli olan merkūm Kurd Beşe yedinden bi’t-tamâm ahz u kabz etdim dedikde, mukırr-ı merkūm Hızır Beşe’yi vech-i muharrer üzre sâdır olan ikrârında vekîl-i mezbûr Kurd Beşe vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-hâmis min Şevvâli’l-mükerrem li sene seb‘a ve ışrîn ve elf. Şuhûdü’l-hâl: Mehmed Çavuş, el-Hâc Ali, Eyüb b. Mehmed, Hamza Du‘âcı, Hasan b. Ahmed, Ahmed Çelebi ve gayruhüm.